دەنگ نێت

 

نزیکەی سێ هەفتە بەسەر روداوی بریندارکردنی ٢ ئەفسەر و پۆلیسێک لە گەرمیان تێدەپەڕێت و هێشتا جگە لە یەک تۆمەتبار، بکەرانی دیکەی روداوەکە دەستگیر نەکراون.

 

شەوى ٢٤/ ١٢/ ٢٠٢٣، له‌ گوندى ساڵح ئاغاى سه‌ر به‌ ناحیه‌ى قۆره‌تو لە گەرمیان، له‌ كاتى هه‌وڵدان بۆ ده‌ستگیركردنى تۆمەتبارێک بە تۆمەتی دزییکردن، روبەڕوبونەوە لەنێوان تۆمەتبارەکە و چەند کەس و هاوڕێیەکی لەلایەک و مەفرەزەیەکی پۆلیس لەلایەکی دیکەوە رویدا، بەوهۆیەشه‌وه‌ ٢ ئەفسەر و پۆلیسێک برینداربون و به‌شێك له‌ تۆمەتبارەکانیش هەڵهاتن. رۆژێک دواتر یەکێک لە تۆمەتبارەکان دەستگیرکرا و چواری دیکەیان هێشتا دەستگیر نەکراون.

 

عه‌لى جه‌مال قه‌دورى، وته‌بێژى به‌ڕێوبه‌رایه‌تى پۆلیسى گه‌رمیان، بۆ رادیۆى ده‌نگ وتى: تاوه‌كو ئێستا كه‌سێك له‌ تۆمه‌تباره‌كان دەستگیر کراوە، ئەوانی دیکە هه‌ڵهاتون بۆ ده‌ره‌وه‌ى گه‌رمیان و پۆلیسیش له‌ هه‌وڵى ده‌ستگیركردنیان دایه‌.

 

دو رۆژ دوای روداوەکە، پۆلیس، دایک و دو کچی ئەو ماڵەی کە روداوەکە تیایدا رویدا، دەستگیرکرد؛ ئەویش بەوتۆمەتەی رێگرییان کردوە لەوە‌ى پۆلیس ئه‌ركى خۆى جێبه‌جێ بكات.