دەنگ نێت

 

بەڕێوبەری چاودێری گەشەپێدانی کۆمەڵایەتی گەرمیان ئاشکرای دەکات: بەدەم دۆسیەی ئەو دایک و کچەوە چوین کە لە یەکێک لە پارکەکانی شاری کەلار دەمانەوە و دەخەوتن، بەشێوەیەک دایکەکە رەوانەی نەخۆشخانەی سۆزی دەرونیی کراوە لە سلێمانی و کچەکەش خراوەتە ماڵی خزمێکیان.

 

لە چەند مانگی رابردودا ناوەناو دایک و کچێک لە یەکێک لە پارکەکانی شاری کەلار دەمانەوە، دوای بڵاوبونەوەی ئەم هەواڵە لە چەند میدیایەکدا، بەڕێوبەرایەتی گشتی چاودێریی و گەشەپێدانی کۆمەڵایەتی گەرمیان لەسەر حاڵەتەکە هاتە سەر هێڵ.

 

ژیلوان عادل، بەڕێوبەری گشتی چاودێری گەشەپێدانی کۆمەڵایەتی گەرمیان، لەبارەی ئەوەی چیان بۆ ئەو دایک و کچە کردوە، بە رادیۆی دەنگی راگەیاند: پێشتر لە کەلار لە شوێنێکی خۆمان جێگەمان بۆ دایکەکە کردەوە بۆ ئەوەی لەسەر شەقام نەبێت، ئەمڕۆ لەگەڵ لیژنەیەکی خۆماندا ناردومانە بۆ سلێمانی بۆ لای لیژنەی پزیشکیی دەرونیی.

 

وتیشی: بەپێی بڕیاری لیژنەکە و پشت بەستن بە راپۆرتێکی پزیشکیی پێشتر، ژنەکە نەخۆشیی شیزۆفرینیای هەیە، هەربۆیە ئێستا لە نەخۆشخانەی سۆزی دەرونیی لەسلێمانی داخلکراوە. 

 

لەبارەی کچەکەشەوە ئاماژەی بەوەکرد هەر لە سەرەتاوە رادەستی خێزانێکی خزمیان کراوە و لەوێ دەمێنێتەوە.