دەنگ نێت

 

یه‌كیك له‌و ناحیانه‌ى كه‌ ساڵانه‌ روبه‌ڕوى گرفتى كه‌م ئاوى ده‌بێته‌وه‌ له‌ گه‌رمیان ناحیه‌ى شێخ ته‌ویله‌، به‌ڕێوبه‌رى ناحیه‌كه‌ش ده‌ڵێت: گرفته‌كه‌ له‌ وه‌رزى هاویندا قوڵ ده‌بێته‌وه‌، چونكه‌ 2 بیرمان هه‌یه‌ له‌گه‌ڵ سه‌رچاوه‌یه‌كى كانى.

 

دانا ئه‌حمه‌د، به‌ڕێوبه‌رى ناحیه‌ى شێخ ته‌ویل، بۆ رادیۆى ده‌نگ باسى له‌وه‌كرد: ناحیه‌ى شێخ ته‌ویل 42 گوندى له‌سه‌ره‌، یه‌كێك له‌و كێشانه‌ى ساڵانه‌ روبه‌رومان ده‌بێته‌وه‌ به‌تایبه‌ت وه‌رزى هاوین گرفتى كه‌م ئاوییه‌، چونكه‌ له‌ نێو خودى ناحیه‌كه‌ 2 بیرمان هه‌یه‌ له‌گه‌ڵ سه‌رچاوه‌یه‌كى كانى.

 

وتیشى: هه‌مو گونده‌كان له‌ وه‌رزى هاوین روبه‌روى كه‌م ئاوى ده‌بنه‌وه‌، چونكه‌ سنوره‌كه‌ بۆ خۆى وایه‌ كه‌ ئاوى كه‌مه‌ و بیره‌كان ئاویان كه‌م ده‌بێته‌وه‌ یاخود سه‌رچاوه‌كانى دیكه‌ وشك ده‌بن.

 

له‌باره‌ى چاره‌سه‌ركردنى ئه‌و كێشه‌یه‌ كه‌ روبه‌رویان ده‌بێته‌وه‌، به‌ڕێوبه‌رى ناحیه‌ى شێخ ته‌ویل هێماى بۆ ئه‌وه‌شكرد: به‌ڕێوبه‌رایه‌تى ئاوى ده‌وروبه‌رى گه‌رمیان زۆر هاوكارمان بوه‌ له‌و روه‌وه‌، له‌گه‌ڵ ئه‌وه‌شدا له‌سه‌ر بودجه‌ى په‌ره‌پێدانى پارێزگاكان ساڵى رابردو داوامان كردوه‌ سه‌رچاوه‌ى كانیه‌كه‌مان بۆ فراوان بكه‌ن، به‌ڵام تاوه‌كو ئێستا نه‌كراوه‌ و چاوه‌ڕوانین.