دەنگ نێت

 

دوای دەرچونی بڕیاری دادگای بەرایی کەلار٢ بە "نایاسایی بونی" پرۆسەی وەرگرتنی پارە لەو ئۆتۆمبیلانەی لەسەر شەقامەکانی ناوبازاڕ دەوەستن، پارێزەرێک دەڵێت: لەکاتی جێگیربونی حوکمەکە، هەر هاوڵاتییەک پارەی دابێتە پارکینگی سەرشەقام، دەتوانێت سکاڵا بکات و پارەکەی وەربگرێتەوە.

 

سۆران حسێن، پارێزەری یەکێک لە دوکاندارەکان کە لەلایەن بەڵێندەری پارکینگی سەرشەقامەکان سکاڵای لێکرابو، بە رادیۆی دەنگی وت: حوکمەکە حوکمێکی بەراییە و پلەی کۆتایی وەرنەگرتوە، ئەو کەسەی سکاڵای تۆمارکردوە دەتوانێت لای دادگای تێهەڵچونەوەی گەرمیان و پاشان هەرێم داوای تێهەڵچونەوە بە حوکمەکە بکات، ئەگەر حوکمەکە وەک ئەوەی ئێستا مایەوە و جێگیر کرا، ئەوا هەر هاوڵاتییەک چەندێک پارەی بۆ راگرتنی ئۆتۆمبیلەکەی دابێت، دەتوانت سکاڵا بکات و پارەکە وەربگرێتەوە.

 

وتیشی: ئەگەر بڕیارەکە تەواو جێگیر ببێت (دوای ئەو دو فلتەرەی دادگاکانی تێهەڵچونەوە)، ئەوا هاوڵاتیان دەتوانن ئۆتۆمبیلەکانیان لەسەر شەقامەکان رابگرن و پارە نەدەن، ئەوەشی لەمەوپێش پارەی داوە، دەتوانێت سکاڵابکات و پارەکەی وەربگرێتەوە.

 

دادگای بەرایی کەلار٢ بە سەرۆکایەتی دادوەر: عەبدولئەمیر جومعە تۆفیق، دادبینی کردوە بۆ کەیسی سکاڵایەکی نێوان دوکاندارێک و ئەو بەڵێندەرەی کە پرۆسەی بەکرێگرتنی شەقامەکانی لە شارەوانی کەلار وەرگرتوە، لە رۆژی ٢١ـی ئەم مانگە حوکمی لە کەیسەکەداوە بەوەی دوکاندارەکە لەسەر هەقە کە رێگەی نەداوە شەقامی بەردەم دوکانەکەی هێڵکاریی بکرێت و بکرێت بە شوێنی وەستاندنی ئۆتۆمبیل بە پارە، هەروەک دادگاکە پرۆسەی بەکرێدانی شەقامی لەلایەن شارەوانییەوە بە نایاسایی زانیوە.