دەنگ نێت

 

دوای ئەوەی لە گوندێکی گەرمیان ٥ راوچی بە ژمارەیەک ئاژەڵ و باڵندەی راوکراوەوە دەستگیرکران، دەرکەوت دوان لەوانە پۆلیسی دارستانن و یەکێکیان ئاسایشە، وتەبێژی بەڕێوبەرایەتی پۆلیسی دارستانی گەرمیانیش دەڵێت: دەدرێنە دادگای سەربازی و مەدەنی.

 

پێرێ دوشەممە لەنێو باخێکدا لەگوندی (ساڵح ئاغا)ـی سەر بەناحیەی قۆرەتو، (٥) کەس دەستگیر کران کە هەستابون بە راوکردن و کوشتنی ئاسک و پۆڕ.

 

بەپێی زانیاریەکانی رادیۆی دەنگ، دوان لە دەستگیرکراوەکان کارمەندی پۆلیسی دارستانن و سەر بە بەشی پۆلیسی دارستان و ژینگەی خانەقینن، هاوکات یەکێکیان کارمەندی ئاسایشە.

 

موقەدەم ئەکرەم، وتەبێژی پۆلیسی دارستانی گەرمیان جەختی لە بابەتەکە کردەوە و بۆ رادیۆی دەنگ وتی: بەیاساکانمان لە وەزارەتی ناوخۆ ئەگەر پۆلیسی دارستان هاوکاری راوچی بو، یان خۆی راوی کرد، جگە لەوەی دەدرێتە دادگای مەدەنی، لەهەمان کاتدا دەدرێتە دادگای سەربازییش.

 

وتیشی: ئەگەر ئەو کارە لەسەریان ساغبویەوە سزا دەدرێن لە سزایەکی کەمەوە تاوەکو ئەوەشی بۆی هەیە فەسڵ بکرێن.