دەنگ نێت

 

بڕیارە ۱٥۰۰ یەکەی نیشتەجێبون لەجۆری شوقە لە گەرمیاندا دروست بکرێن و بەشێوازی قیست بدرێن بە هاوڵاتیان، بەڕێوبەری نەخشەدانانی ئاوەدانیی گەرمیانیش دەڵێت: بۆ لەمەودوا هەر گەنجێک هاوسەرگیری بکات دەبێت بەخاوەنی یەکەی نیشتەجێبونی خۆی.

 

ئەو ١٥٠٠ یەکەیە، ۹۰۰ یەکەی لە قەزای کەلارە و ۳٦۰ یەکەی لە قەزای کفریە و ۲٤۰ یەکەی لە ناحیەی رزگاریە.

 

 سامان مەحمود، بەڕێوبەری بەڕێوبەرایەتی نەخشەدانانی ئاوەدانیی گەرمیان بۆ رادیۆی دەنگ وتی: زەویەکان بۆ پرۆژەکە بۆ پێشنیارکراوە و وەبەرهێنێکیش داوای کردوە و مامەڵەکەشی تاڕادەیەک تەواوبوە، دەیکات بەیەکەی نیشتەجێبون بەشێوەی تاوەر بۆ کەمدەرامەتان و ئەوانەی خێزانیان پێکهێناوە و جێگای مانەوەیان نیە.

 

وتیشی: پێشبینیش دەکرێت کەمترین نرخی هەبێت لەهەمو شتەکان کە لە نزیکەی ۳٥۰ دۆلار دەبێت، بەشێوەی "اقتصادی" دەکرێت بۆ ماوەیەکی درێژ و بۆ لەمەودوا هەر گەنجێک هاوسەرگیری بکات دەبێت بەخاوەنی یەکەی خۆی.

 

دەشڵێت: ئەو شوێنەی بۆ دروستکردنی ۹۰۰ یەکەکەی کەلار پێشنیارکراوە دەکەوێتە پشت پڕۆژەی نیشتەجێبونی مامۆستایان و بامۆکەوە، بەڵام جارێ زەوی بۆ یەکەکانی کفری و رزگاری دیارینەکراوە. 

 

بەوتەی بەڕێوبەری نەخشەدانی ئاوەدانیی گەرمیان، وەبەرهێنەرەکە داوای رای پلانسازی کردوە، پلانسازیش دەڵێت زەویەکە هیچ کێشەیەکی نیە، لە ئێستاشدا داوای سایت پلان و سێتی تەلارسازییەکەیان کردوە.