دەنگ نێت

 

سه‌رۆكى لقى گه‌رمیانى سه‌ندیكاى كرێكارانى كوردستان دەڵێت بە بڕیار و میزاجی شەخسی نوێنەرانی ئێمە لە لیژنەکانی چاودێریی قایمقامیەت نەهێڵراون، به‌رپرسى راگه‌یاندنى قایمقامیەتی کەلاریش ده‌ڵێت: رێنماییه‌كان رێگه‌ نادەن له‌نێو لیژنه‌كاندا هه‌بن.

 

‌عه‌دنان محه‌مه‌د، سه‌رۆكى لقى گه‌رمیانى سه‌ندیكاى كرێكارانى كوردستان له‌ لێدوانێكیدا بۆ رادیۆى ده‌نگ وتى: له‌نێو لیژنه‌كانى قایمقامیه‌تى قه‌زاى كه‌لاردا بە تەنها نوێنه‌رى ئێمه‌ لابراوه‌، له‌ كاتێكدا پێشتر له‌ناو لیژنه‌كانى چاودێریی سه‌رتاشخانه‌ و ئارایشتگا و ماركێت و عه‌لوه‌ و لیژنه‌ى ته‌ندروستى ئەنداممان هه‌بوە.

 

جه‌ختى له‌وه‌شكره‌وه‌: ئه‌مەی كه‌ كراوه‌ به‌ نوسراوێكى فه‌رمی نه‌بوه‌، به‌ڵكو به‌ میزاجى شه‌خسى كراوه‌ و نوێنه‌ره‌كانمان دورخراونه‌ته‌وه‌. 

 

له‌ به‌رامبه‌ردا، هەردی سەرکەوت، به‌رپرسى به‌شى راگه‌یاندنی‌ قایمقامیه‌تى قه‌زاى كه‌لار، بۆ رادیۆى ده‌نگ باسى له‌وه‌كرد: رێنماییه‌كان رێگه‌ نادەن نوێنه‌رى سه‌ندیكاكان له‌ نێو لیژنه‌كاندا هه‌بن.

 

وتیشى: ئاگاداركراوینه‌ته‌وه‌ به‌تایبه‌ت له‌لایه‌ن گه‌نجینه‌وه‌ کە ئه‌و لیژنانه‌ى پێكده‌هێنرێن ده‌بێت نوێنەری به‌ڕێوبه‌رایتییه‌ حکومییەکانیان تێدا هەبن نه‌ك سه‌ندیكاكان.