دەنگ نێت

 

له‌ ته‌نیشت روبارى سیروان لە کەلار پاشماوەی خانو فڕێدەدرێت و گومان دەکرێت هی پرۆژەکانی نیشتەجێبون بێت، به‌ڕێوبه‌رى فه‌رمانگه‌ى ژینگه‌ى گه‌رمیانیش ده‌ڵێت: لیژنه‌ پێکدەهێنین و رێکار دەگرینەبەر.

 

پشتیوان عەلی، مامۆستا لە کەلار، ئاشکرای کردوە: هەرچی پاشماوەی کەرەستەی بیناسازی و پلاستیک و کەرەستەی سوتەمەنی هەیە فڕێدەدرێتە نێو روباری سیروان لە کەلار.

 

گومانی خۆیشی پیشانداوە کە ئەو کەرەستانە هی پرۆژەی نیشتەجێبونی ئەو سنورە بێت کە فڕێیدەدەنە کەنار روبارەکە و دواتر تێکەڵی روبارەکە دەبێت.

 

لەوبارەوە رادیۆی دەنگ پەیوەندیی بە د. دوره‌ید سه‌لیم- به‌ڕێوبه‌رى فه‌رمانگه‌ى ژینگه‌ى گه‌رمیانەوە کرد، ئەویش رایگەیاند: لیژنه‌مان پێكهێناوه‌ بۆ ئه‌و مه‌به‌سته‌ و سه‌ردانى شوێنه‌كه‌ ده‌كه‌ن، ئه‌گه‌ر سه‌لمێنرا كه‌ پاشماوه‌ى پرۆژەکانت نیشته‌جێبونه‌ ئه‌وه‌ ئه‌ركه‌ له‌سه‌ر کۆمپانیای جێبەجێکاری پرۆژەکان پاشماوه‌كان كۆبكەنەوە و بیبەن‌ لە شوێنێك كه‌ بۆى دیارى ده‌كه‌ین فڕێى بدات.

 

وتیشى: ماوه‌ى 10 رۆژى بۆ دیارى ده‌كه‌ین بۆ لابردنى سه‌رپێچیه‌كه‌ى.

 

هێماى بۆ ئه‌وه‌شكرد: ئه‌گه‌ر پابه‌ند نه‌بێت سزاى پێبژاردنى بۆ ده‌كه‌ین كه‌ له‌ ده‌سه‌ڵاتى خۆمان دایه‌ و ده‌توانین تاوه‌كو 10 ملیۆن دینار سزاى بۆ بكه‌ین بۆ هه‌ر بابه‌تێكى ژینگه‌یی، هاوكات له‌و ماوه‌شى بۆى دیارى ده‌كه‌ین پێوه‌ پابه‌ند نه‌بێت ئه‌وه‌ سزاى پێبژاردنه‌كه‌ى ده‌كه‌ین به‌ 2 هێنده‌ و ئاراسته‌ى دادگاشى ده‌كه‌ین.