دەنگ نێت

 

ژمارەیەک خوێندکاری ماستەر لە گەرمیان باس لەوەدەکەن ئەنجومەنی زانکۆی گەرمیان بڕیاریداوە خوێندنی ماستەرمان بۆ خولێکی تر دوابخات، دەشڵێن: بڕیارەکە نادادپەروەرانەیە.

 

خوێندکارانی ماستەری زانکۆی گەرمیان کە ژمارەیان ٤١ خوێندکارە، لە پەیامێکدا رایانگەیاندوە: ئەنجومەنی زانکۆی گەرمیان فەرمانی کردوە بە دواخستنی خوێندن بۆ خولێکی تری کردنەوەی خوێندنی باڵا لە زانکۆ حکومییەکانی هەرێمی کوردستان.

 

دەشڵێن: ئێمە هەمو رێکارێکی یاسایی دەستبەکاربونی خوێندنمان تەواو کردوە، هەروەها مۆڵەتی خوێندنمان وەرگرتوە و هەندێکیشمان وەسڵی (٢٥٠) هەزار دیناریشمان بڕیوە و قیستی یەکەمی خوێندنیشمان لێوەرگیراوە.

 

ئەو ژمارە خوێندکارەی ماستەر، ئەو بڕیارەی ئەنجومەنی زانکۆی گەرمیان بە "ئەوپەڕی نادادپەروەریی" دەزانن، دەشڵێن: لەبەر هەر بیانویەک خوێندنەکانمان دواخراوە، بۆچی هەر لەسەرەتاوە وەرگیراین؟

 

رادیۆی دەنگ بۆ بەدواداچونی ئەم پرسە پەیوەندیی بە سەرۆکی زانکۆی گەرمیان- د. فەرهاد قادرەوە کرد، بەڵام پەیوەندییەکەی بێوەڵام بو.