دەنگ نێت

 

دوای شەش ساڵ لە راگەیاندنی، ئینسایکلۆپیدیای گەرمیان کە زانکۆی گەرمیان ئەنجامی دەدات، هیچ بەرهەمێکی بڵاونەکراوەتەوە، سەرپەرشتیاری پرۆژەکەش دەڵێت: رەنگە ساڵی داهاتو بەرگێکی بڵاوببێتەوە.

 

لەکۆتایی ساڵی ٢٠١٧ـدا، زانکۆی گەرمیان پرۆژەی ئامادەکردنی ئینسایکلۆپیدیایەکی (موسوعة) تایبەت بە گەرمیان راگەیاند، کە لەجۆری ئینسایكلۆپیدیای گشتی دەبێت و كایەكانی ژیان لە بواری: جوگرافیا، مێژو، زمان، ئەدەب، هونەر، كلتور، ئابوری، شوێنەوار و گەشتوگوزار ...هتد لەخۆدەگرێت.

 

د. دارا حەمید، خاوەنی بیرۆکە و سەرپەرشتیاری ئینسایکلۆپیدیاکە، لەبارەی کارەکانیانەوە بە رادیۆی دەنگی وت: لەئێستادا بەبەردەوامی کار لە پرۆژەکەدا دەکرێت، بەڵام چونکە ئینسایکلۆپیدیا کاری ورد و زۆری هەیە، بۆیە کاتێکی زۆری دەوێت بۆ تەواوبون.

 

ئاشکرایشیکرد؛ پێنج بەرگی ئینسایکلۆپیدیاکە ئامادەی چاپە و بەهۆی قەیرانی داراییەوە چاپ نەکراون، پێدەچێت لە ساڵی داهاتودا بەرگێکی لێ چاپ بکرێت.