دەنگ نێت

 

بەشێک لە شەقام و کۆڵانەکانی قەزای کەلار چاڵیان تێکەوتوە و قیر و کۆنکرێتەکانیان تەواو خراپ بون، لەبارەی چاککردنیانەوە سەرۆکی شارەوانی کەلار دەڵێت: شەقامێکی سەرەکی چاکدەکەین، بەڵام کۆڵانەکان زۆرن و دواتر دێینە سەریان.

 

شەقامی کەلارـ کفری لە سێ رێیانی نزیک قەڵای شێروانە دەستپێدەکات تاوەکو بەرزە پردی کەلارـ رزگاری، نزیکەی دە ساڵ دەبێت دروستکراوە، بەڵام لەئێستادا چاڵێکی زۆر لە شەقامەکەدا دروستبوە و قیرەکەی خراپ بوە، ئەمە جگە لەوەی بەشێک لە جادەی کۆڵانەکانی کەلار  بەگشتیی خراپ بون و چاڵ و تاسەیەکی زۆریان تیادروستبوە.

 

ئەکرەم ساڵح، سەرۆکی شارەوانی کەلار، لەمبارەیەوە بەرادیۆی دەنگی راگەیاند: تەنها شەقامی کەلار- کفرییە کە زۆر بەرەو تێکچون دەڕوات، ئەویش هەمو رەزامەندیەکانمان تەواو کردوە و تەندەرەکەشمان راگەیاندوە، بەمنزیکانە دەست بە نۆژەنکردنەوەی دەکەین.

 

وتیشی: زۆرێک لە جادەی ناو کۆڵانەکانی کەلار وەکو گەڕەکەکانی: بنگرد، فەرمانبەران، سەرکەوتن و… هتد خراپن، ئێمە جارێک لەشەقامە سەرەکیەکان کاردەکەین، با شەقامەکان تەواو بێت دواتر دێینە ناوکۆڵانەکان و دەست بەچاککردنیان دەکەین.

 

دەستکردن بەکاری نۆژەنکردنەوە لە قەزای کەلار لەلایەن شارەوانیەوە لەکاتێکدایە لەئێستادا دەستکراوە بە چەند پرۆژەیەکی دروستکردن و نۆژەنکردنەوەوە، بەڵام بەهۆی نەبونی بودجە و بەردەست نەبونی پارەی پێویست، کارەکانیان راگیراوە.