دەنگ نێت

 

دوای ئەوەی لیژنەیەک لەوەبەرهێنان پێکهێنرا بۆ چارەسەرکردنی کێشەی وەرگرتنی باج لە کاسبکارانی عەلوەکە لەلایەن کۆمپانیایەکەوە، ئەمڕۆ کۆبونەوە کراوە و نوێنەری کاسبکارانیش دەڵێت: نەک هەر کێشەکە چارەسەرنەکراوە، بەڵکو بازگەکەش دانراوەتەوە. 

 

کاسبکارانی عەلوەی کەلار کە ژمارەیان 116 دوکاندارە، لەماوەکانی پێشودا گردبونەوەیان ئەنجامدا دژی ئەو باجەی کۆمپانیایەک لێی وەردەگرتن و بە سەرانە وەرگرتنیان دەزانی.

 

کامەران فەیزوڵڵا، نوێنەری کاسبکارانی عەلوەکەی کەلار، بەرادیۆی دەنگی وت: هیچ کێشەیەکمان چارەسەرنەکراوە، سەرەڕای ئەوەش دوای لابردنی بازگەکە بۆ ماوەی زیاتر لە ۲۰ رۆژ دوبارە دانراوەتەوە و پارە لە هاوڵاتیان وەردەگرن.

 

وتیشی: ئێمەش لەبەرامبەردا تەنها یەک چارەسەرمان هەیە ئەویش پارەی خزمەتگوزاریان پێ نادەین، تا کێشەکانمان چارەسەرنەکرێت.

 

کاسبکارانی عەلوەکە لەماوەکانی پێشوتر و بەئێستاشەوە چوار داواکاری سەرەکیان هەیە ئەوانیش: خاوەندارێتی عەلوەکە دیاریبکرێت، سەعاتی کارەباکان بکرێن بەناوی خاوەنی ئەسڵی خۆیانەوە، ئەو بازگەیەی پارە لەهاوڵاتی وەردەگرێت نەمێنێت و پارەی خزمەتگوزاریش کەم بکرێتەوە.