دەنگ نێت

 

بەڕێوبەری گشتی کشتوکاڵی گەرمیان ئاشکرای دەکات ئەو پرۆژەیەی کە بڕیاربو لە رۆخی روباری سیرون دروستبکرێت و دەبوە هۆی لەناوبردنی دەیان باخ و هەزاران دار، لەو شوێنەدا جێبەجێ ناکرێت و باخەکان دەمێننەوە.

 

شادیە حسێن، بە رادیۆی دەنگی وت: کۆبونەوەیەک لەنێوان نوسینگەی جێگری سەرۆکی حکومەت و وەزارەتی کشتوکاڵ و بەڕێوبەرایەتیمان ئەنجامدراوە بۆ قسەکردن لەسەر ئەو بابەتە و تیایدا بڕیاردراوە بەوەی پرۆژەکە لەو شوێنە ئەنجام نەدرێت و باخ و دارەکان لانابرێن و لەشوێنی خۆیان دەمێننەوە.

 

حکومەتی خۆجێی گەرمیان بڕیاریداوە ژمارەیەک پرۆژەی تێکەڵی گەشتیاریی و بازرگانی و نیشتەجێبون لە کەناری روباری سیروان لە کەلار ئەنجام بدات و بۆ ئەم مەبەستەش کەناری روبارەکە دابەشکراوە بەسەر ٦ زۆندا و هەر زۆنەی دەدرێت بە کۆمپانیایەک یان زیاتر، تائێستاش تەنها زۆنی دوەمی ئەو پرۆژەیە چوەتە بواری جێبەجێکردنەوە.

 

زۆنی یەکەمی ئەو پرۆژەیە کە لە گردەگۆزینەوە بە ئاراستەی باکور و تا نزیک قەڵای شێروانە دێت، دەیان باخی کشتوکاڵیی بەردەکەوت کە بڕیاربو هەمویان لەناوببرێن.

 

رۆژی ٢ـی ئەیلولی ئەمساڵ، رادیۆی دەنگ راپۆرتێکی بڵاوکردەوە و تیایدا گلەیی و گازندەی جوتیارانی لەبارەی ئەو پرۆژەیەوە خستەڕو (کلیک بکە بۆ بینینی راپۆرتەکە)، چەند رۆژێک دواتر جوتیاران دەستیان بە خۆپیشاندان و گردبونەوە کرد بەمەبەستی هێشتنەوەی باخەکانیان و بەوتەی خۆیان، ئەو باخانە سەروی ١٠٠ هەزار داری بەریی جۆراوجۆر لەخۆدەگرن.