دەنگ نێت

 

کەریم عەلی- ئەندامی ئەنجومەنی پارێزگای سلێمانی، ئەمڕۆ پاش چونە بەردەم دادگای لێکۆڵینەوە لەسەر سکاڵایەکی وەزارەتی دارایی، بە فەرمانی دادوەر راگیرا (توقیف کرا).

 

کاوە لەتیف، پارێزەری کەریم عەلی، بە رادیۆی دەنگی وت: دوای ئەوەی لەلایەن وەزارەتی داراییەوە سکاڵا لەسەر کەریم عەلی- ئەندامی ئەنجومەنی پارێزگای سلێمانی تۆمارکرا، ئەمڕۆ چوە بەردەم دادگای لێکۆڵینەوەی کەلار و لەلایەن دادوەرەوە بڕیاری راگرتنی درا هەتا تەواوکردنی لێکۆڵینەوەکان و ئێستا لە گرتوخانەی ئاسایش راگیراوە.

 

وتیشی: سکاڵاکەی وەزارەتی دارایی بە پشت بەستن بە مادەی (٢)ـی یاسای خراپ بەکارهێنانی ئامێرەکانی پەیوەندیکردن تۆماری کردوە.

 

بەپێی یاسا تەوقیف کردن تاوەکو ١٥ رۆژە، پارێزەرەکەی کەریم عەلی جەختی لەوە کردەوە و وتی: سبەی هەوڵدەدەین بە کەفالەت ئازادی بکەین، بەڵام بڕیار لای دادوەرە ئازادی دەکات یاخود نا.

 

کەریم عەلی، پێشتر لە بەرنامەیەکی تەلەفزیۆنیی دا باسی لە بونی حاڵەتی نایاسایی و قاچاخی لە دەروازەی پەروێزخان کردبو کە دەروازەیەکی نێودەوڵەتی نێوان ئێران و هەرێمە لە گەرمیان، لەدوای بەرنامەکەش وەزارەتی دارایی لە کۆنگرەکەی رۆژنامەوانیی دا وەڵامی دایەوە و چەند رۆژێک دواتر سکاڵای لە دادگای لێکۆڵینەوەی ئاسایش لەسەر تۆمارکرد و فەرمانی دەستگیرکردنی بۆ دەرکرا.