دەنگ نێت

 

سبەینێ هەڵبژاردنی ناوخۆیی مەڵبەندی گەرمیانی یەکێتی بەڕێوەدەچێت بۆ دیارییکردنی ٥ نوێنەر بۆ کۆنگرەی پێنجەمی ئەو حزبە، وتەبێژی مەڵبەندی گەرمیانی یەکێتیش دەڵێت: ١٣ کادیر خۆیان کاندید کردوە.

 

لە ٢٧ـی ٩ـی ٢٠٢٣، کۆنگرەی پێنجەمی یەکێتی نیشتیمانی بەڕێوەدەچێت، لەئاستی مەڵبەندەکانی ئەو حزبەدا هەڵبژاردن دەکرێت و بەشێکی ئەندامانی کۆنگرە لەو رێگەیەوە دیاریی دەکرێن، بەشەکەی دیکە لە نمونەی ئەنجومەنی سەرکردایەتی، راستەوخۆ و بەبێ هەڵبژاردن دەچنە کۆنگرەوە.

 

وتەبێژی مەڵبەندی گەرمیانی یەکێتی نیشتمانی کوردستان- عەلی دەروێش، بەرادیۆی دەنگی راگەیاند: پێنج نوێنەرمان لە گەرمیان دەبنە ئەندامی کۆنگرە، ئەم ژمارە نوێنەرەش بە پشت بەستن بە دەنگی حزبەکەمان لە دواین هەڵبژاردنی گشتی دیارییکراوە.

 

یەکێتی لە هەڵبژاردنی ئەنجومەنی نوێنەرانی عێراق سەروی ٩ هەزار دەنگی لە سنوری مەڵبەندی گەرمیان دا بەدەستهێنا، بەوپێیەی هەر ئەندامێکی کۆنگرە یەکسانە بە ٢ هەزار دەنگ، هەربۆیە ٥ کورسی بۆ گەرمیان تەرخانکراوە.

 

وتەبێژی مەڵبەندی گەرمیانی یەکێتی، وتیشی: دو ئەنجومەنمان لە مەڵبەندی گەرمیان هەیە (ئەنجومەنی گشتی مەڵبەند و ئەنجومەنی راوێژکاری)، لەناو هەردو ئەنجومەنەکە ۱۳ کادیرمان خۆیان کاندید کردوە کە سیانیان ژنن، لەو ژمارەیەش ٥ کەسیان دەبن ئە ئەندامی کۆنگرە کە مەرجە یەکێکیان ژن بێت.

 

لەبارەی چۆنێتی خۆپاڵاوتنی ئەو ۱۳ کەسە بۆ بون بە ئەندامی کۆنگرە، عەلی دەروێش دەڵێت: لیژنەیەک لەمەکتەبی هەڵبژاردن و رێکخستنەوە هاتون لە کاتژمێر ۹ـی بەیانی بۆ ٤ـی ئێوارە دانیشتون، درگاکراوە بوە بۆ پڕکردنەوەی فۆرم بۆ خۆپاڵاوتنی هەرکەسێک لە ئەنجومەنەکان بە ئازادانە.

 

ئاماژەی بەوەشدا سبەینێ هەڵبژاردنەکە بەڕێوەدەچێت و (١٦٠) کادیر لە هەردو ئەنجومەنەکە مافی دەنگدانیان هەیە (٩٨ کادیر لە ئەنجومەنی راوێژکاریی و ٦٢ کادیر لە ئەنجومەنی گشتی مەڵبەند).