دەنگ نێت

 

بڕیارە سەنتەرێکی ئۆتیزمی حکومی لە قەزای کفری بکرێتەوە، بەڕێوبەری گشتی چاودێری گەشەپێدانی کۆمەڵایەتی گەرمیانیش دەڵێت: چاوەڕێی چۆڵکردنی بیناکەین لەم هەفتەیەدا.

 

ژیلوان عادل، بەڕێوبەری گشتی چاودێری و گەشەپێدانی کۆمەڵایەتی گەرمیان، بە رادیۆی دەنگی راگەیاند: بڕیارە لە قەزای کفری سەنتەرێک بۆ نەخۆشانی ئۆتیزم بکەینەوە.

 

ئەو بینایەی بڕیارە سەنتەرەکەی تیابکرێتەوە، لەبنەڕەتەوە بینای دایەنگەی مناڵانە و سەر بەوەزارەتی کاروباری کۆمەڵایەتیە، ماوەی چەند ساڵێکیشە کارەبای کفری و شارەوانی کفری لەناو ئەو بینایەدا کارەکانیان بەڕێدەکەن.

 

بەوتەی ژیلوان عادل، بڕیارە بیناکە هەفتەی داهاتو بە فەرمی وەربگرنەوە، دوای ئەوەی پێشتر فەرمانگەی کارەبا چۆڵیان کردوە، ئێستا شارەوانی ماوە و ئەوانیش سەرقاڵی چۆڵکردنین.

 

باسی لەوەشکرد: دوای وەرگرتنەوەی بیناکە، سەرەتا هێنانە کایە بۆ سەنتەرەکە دەکرێت و دواتر کارەکانی نۆژەنکردنەوە دەست پێدەکەین هەتا کردنەوەی سەنتەرەکە.

 

لەگەرمیان چەند سەنتەرێکی ئۆتیزمی ئەهلی هەن کە لەلایەن چاودێری و گەشەپێدانی کۆمەڵایەتی گەرمیانەوە چاودێری دەکرێن، بەڵام سەنتەری حکومی تائێستا بونی نیە.

 

ئۆتیزم (Autism) نەخۆشییەکی مێشکییە و لەمناڵییەوە کەسەکە توشی دەبێت کە وادەکات رەفتاری ئاسایی نەبێت و توانای گفتوگۆ و پەیوەندییە کۆمەڵایەتییەکانی کەمدەبێتەوە و لەهەندێک باردا نامێنێت.