دەنگ نێت

 

ساڵێك به‌سه‌ر تیرۆركردنی نوسەر و لێکۆڵەر (م. شەماڵ) لە کفری تێپه‌ر ده‌بێت، كورێكیشی ده‌ڵێت: كه‌یسه‌كە به‌كراوه‌یی ماوه‌ته‌وه‌ و لێكۆڵینه‌وه‌ش تێیدا به‌رده‌وامه‌.

 

رۆژی ٢٨ـی ئابی ٢٠٢٢، سوهێل خورشید عەزیز، ناسراو بە (م. شەماڵ) لەدایکبوی ١٩٦٠ و فەرمانبەر لە کشتوکاڵی کفری کە هاوکات کادیری تەڤگەری ئازادی نزیک لە پەکەکە بو و نوسەر و لێکۆڵەری بواری مێژو و جوگرافیای گەرمیان و کەرکوک بو، لەبەردەم ماڵەکەی خۆی لە کفری بە دەستڕێژی گولە کوژرا. 

 

رەنجە سوهێل، کوڕی سوهێل خورشید، بە رادیۆی دەنگی وت: له‌سه‌ر كه‌یسه‌كه‌ كاركراوه‌، به‌ڵام به‌كراوه‌ی ماوه‌ته‌وه‌ و لێكۆڵینه‌وه‌ش تێیدا به‌رده‌وامه‌.

 

وتیشی: تاوه‌كو ئێستا یه‌ك كه‌س ده‌ستگیركراوه‌ ئه‌ویش برایه‌كی بکوژەکەیه‌ و گومانێکی زۆر هەیە ئەویش پەیوەندی بەتاوانەکەوە هەبوبێت بۆیە تائێستاش دەستبەسەرە.

 

پێشتریش سه‌رچاوه‌یه‌ك له‌ ئاسایشی گه‌رمیان بۆ رادیۆی ده‌نگ جه‌ختی كرده‌وه‌ كه‌ برای بکوژه‌كه‌ گیراوه‌ و ماددە یاساییەکەی لە ٤۰٦ـی یاسای سزادانەوە گۆڕدراوە بۆ ماددەی ٢ـی تیرۆر. 

 

ته‌نها دورۆژ دوای تاوانەکە، رادیۆی دەنگ لەسەر زاری سەرچاوەیەکی ئەمنییەوە بڵاویکردەوە: تیرۆرکەر و تەقەرەکە ناوی (یڵدرم)ـەو کادیری بەرەی تورکمانیە، دوای ئەنجامدانی تاوانەکە و گەڕانەوەی لە کفرییەوە بۆ کەرکوک، ئۆتۆمبیلەکەی لە داقوق جێهێشتوە و خۆیشی بەرەو تورکیا هەڵهاتوە.