دەنگ نێت

 

حاڵەتەکانی ئاگر کەوتنەوە یان ئاگر بەردان لە تایە و پاشماوەی دیکە لەشوێنی فڕێدانی خاشاکی ناحیەی رزگاری و کەلار، روی لە زیادبون کردوە و هاوڵاتیانی بێزارکردوە، بەڕێوبەری فەرمانگەی ژینگەی گەرمیانیش دەڵێت: نوسراومان ئاڕاستەی قایمقامیەت کردوە بۆ دەستگیرکردنی ئەوکەسانەی بەو کارە هەڵدەستن.

 

بەپێی چەند گرتە ڤیدۆیەک کە بۆ پەیجی رادیۆی دەنگ نێردراوە، ئاگر لە شوێنی خاشاکی ناحیەی رزگاری و کەلار دەکرێتەوە و تایە و خاشاکیان تێدا دەسوتێنرێت، بەمەش دوکەڵێکی زۆر بڵاودەبێتەوە.

 

د. دورەید سەلیم، بەڕێوبەری فەرمانگەی ژینگەی گەرمیان، بەرادیۆی دەنگی راگەیاند: ئەوانەی دەسوتێنرێن تایەی ئۆتۆمبێلن و بوەتە سەرچاوەی ژیان بۆ کەسانێک و دوای سوتاندنی تایەکان سیمەکەی بەکارئەهێنن، بەڵام دوکەڵەکەی کاریگەری بۆسەر دانیشتوانی نزیک لەو شوێنه هەیە.

 

بۆچارەسەرکردنی ئەم حاڵەتەش ئاماژەی بەوەدا: پێشتریش نوسراومان ئاڕاستەی قایمقامیەتی کەلار کردوە و داوامان کردوە لەڕێگەی لیژنەی ئەمنیەوە ئەم بابەتە چارەسەر بکرێت، چارەسەرەکەش ئەوەیە ئەو کەسانە دەستگیر بکرێن کە هەستاون بە ئاگرکردنەوەکە و دواتر ئێمەش سکاڵایان لەسەر تۆمار دەکەین.

 

جەختی لەوەشکردەوە: تائێستا ئاگادار نەکراوینەتەوە کەکەسێک گیرابێت لەسەر ئەم بابەتە.