دەنگ نێت

 

پاش نزیکەی ٣ ساڵ پۆندی عەلی میر لە سنوری گەرمیان سەرڕێژ بوە، بەڵام هێشتا نیوەی پۆندەکە ئاوە و ئەوی دیکەی قوڕ و لیتەیە.

 

لە سنوری گەرمیان دا بەگشتی ١٠ پۆند 'بەنداوی بچوک' هەن، بەهۆی جیاوازی بارانبارینەوە بەشێکیان تاوەکو ئێستا سەرڕێژیان نەکردوە، بەڵام پۆندی 'عەلی میر' کە لەنێوان گوندی عەلی میر و مەحمود قەجەرە و دەکەوێتە سنوری ناحیەی قۆرەتو، پاش سێ ساڵ، سەرڕێژ بوە.

 

موئەیەد ئەحمەد، بەڕێوبەری بەڕێوبەرایەتی ئاودێری گەرمیان، لەوبارەیەوە بە رادیۆی دەنگی وت: پۆندی عەلی میر کە بەرزیەکەی ١٣ مەترە و توانای گلدانەوەی ٦٥٠ هەزار مەتر سێجایە، بۆ ئەمساڵ بەتەواوی سەرڕێژ بوە.

 

وتیشی: بەڵام ئێستا بەهۆی نیشتنەوەی قوڕ و لیتە تێیدا، زیاتر لە نیوەی توانای خۆی ئاوی گلداوەتەوە.

 

باسی لەوەشکرد ساڵانی رابردو پۆندی عەلی میر کەمترین ئاوی تێدا بوە، پارساڵ تەنها ٪١٠ـی ئاوی تیدابوە و چەند ساڵێکە سەرڕێژی نەکردوە.

 

ئاماژەی بەوەشکرد پۆندەکە زیاتر بەمەبەستی کشتوکاڵیی و ئاژەڵداریی سودی لێوەردەگیرێت.