دەنگ نێت

 

بنکەی پۆلیسی دادگاکان لە گەرمیان دەکرێتەوە، وتەبێژی پۆلیسی گەرمیان دەڵێت: بۆ کۆکردنەوەی هەمو ئەو کارانەیە کە پەیوەندیدارن بە دادگاکانی گەرمیانەوە.

 

عەلی جەمال قەدوری، وتەبێژی پۆلیسی گەرمیان، بۆ رادیۆی دەنگ وتی: بنکەکە بۆ کۆکردنەوەی هەمو ئەو کارانەیە کە پەیوەندیدارن بە دادگاکانی گەرمیان و وەزارەتی دادەوە، هاوكاتیش ئەم بنکەیە هەمو ئەو کارمەندانەی پێشوتر ئەرکیان دەبینی دانراونەتەوە بەشێوەیەکی رێکخراو.

 

 بەوتەی وتەبێژی پۆلیسی گەرمیان، نەقیب: سەربەرز عومەر بە لێپرسراوی بنکەکە دیاری کراوە.

 

نەقیب: سەربەرز عومەر، پێشتر لە بەڕێوبەرایەتی پۆلیسی گەرمیان، لێپرسراوی پۆلیسی کۆمەڵگەیی بوە، دواتر بو بە لێپرسراوی پۆلیسی شارەوانیەکانی گەرمیان.

 

بڕیارە بنکەی پۆلیسی دادگاکانی گەرمیان لەناو دادگای بەرایی کەلاردا بکرێتەوە، بەڵام بەوتەی بەرپرسانی پۆلیس، بەهۆی نەبونی بیناوە، بنکەکە لە بەڕێوبەرایەتی پۆلیسی گەرمیان ئیشوکارەکانیان بەڕێدەکات.