دەنگ نێت

 

به‌ڕێوبه‌رى گشتی گه‌شتوگوزارى گه‌رمیان ده‌ڵێت: به‌ گوژمه‌ى 1 ملیار دینار پرۆژه‌ى گه‌شتیارى به‌نداوى باوه‌شاسوار راگیراوه‌ كه‌ له‌ %15ـى كاره‌كانى ته‌واو بوه‌.

 

هێرش فه‌یزوڵڵا، به‌ڕێوبه‌رى گشتى گه‌شتوگوزارى گه‌رمیان، بۆ رادیۆی ده‌نگ وتى: چه‌ند پرۆژه‌یه‌كى گه‌شتیاری سنوره‌كه‌ راگیراون، دیارترینیان پرۆژه‌ى گه‌شتیارى سه‌ر به‌نداوى باوه‌شاسواره‌ كه‌ له‌ %15ـى كاره‌كانى ته‌واو بوه‌ و گوژمه‌كه‌ى یه‌ك ملیار دیناره‌، ئه‌مه‌ش له‌گه‌ڵ سه‌رهه‌ڵدانى قه‌یرانى داراییه‌وه‌.

 

جه‌ختى له‌وه‌شكرده‌وه‌: قۆناغى دوه‌ممان كاركردنه‌ له‌سه‌ر به‌گه‌ڕخستنه‌وه‌ى ئه‌و پرۆژه‌یه‌.

 

به‌رای خۆیشی پرۆژه‌كه‌ رۆڵی ده‌بێت له‌وه‌ى به‌نداوه‌كه‌ ببێته‌ ناوچه‌یه‌كى گه‌شتیاریی مۆدێرن.

 

به‌نداوى باوه‌شاسوار نزیكه‌ى 10 ساڵه‌ له‌ قه‌زاى كفری دروستكراوه‌ كه‌ ئاوى باراناو و لافاو و چه‌مه‌ وه‌رزییه‌كانى سنوره‌كه‌ گلده‌داته‌وه‌، وێڕای سودی بۆ ئاوی ژێر زه‌وی ناوچه‌كه‌ و كشتوكاڵكردن، هاوكات ژینگه‌یه‌كى له‌بارى ره‌خساندوه‌ بۆ ئه‌نجامدانى پرۆژه‌ى گه‌شتیاریی، به‌ڵام له‌وباره‌یه‌وه‌ هیچ هه‌نگاوێك نه‌نراوه‌ و پرۆژه‌كه‌ش وه‌كو ناوچه‌یه‌كى ته‌ریكی بێ خزمه‌تگوزاریی ماوه‌ته‌وه.