دەنگ نێت

 

هاوڵاتیه‌ك له‌ گه‌ڕه‌كى سه‌ركه‌وتنى قه‌زاى كه‌لار ده‌ڵێت: دوای ئەوەی لەلایەن کۆمپانیایەک پشکنین بۆ ئاوى خواردنه‌وه‌یان کراوە، بەگوێرەی دەرەنجامەکەی ئاوی خواردنەوەیان شیاو نییە بۆ خواردنەوە، به‌ڕێوبه‌رى ئاوى كه‌لاریش دەڵێت: ئەو کۆمپانیایانە خۆڵ دەکەنە چاوی خەڵکەوە‌.

 

ساڵه‌ح میروه‌یس، هاوڵاتى له‌ گه‌ڕه‌كى سه‌ركه‌وتنى قه‌زاى كه‌لار، له‌ ئه‌كاونتى خۆى له‌ تۆڕى كۆمه‌ڵایه‌تى فه‌یسبوك بڵاوى كردوه‌ته‌وه‌‌: دوای ئەوەی لەلایەن کۆمپانیای کۆمپیللۆوە پشکنین بۆ ئاوى خواردنه‌وه‌یان کراوە، بەگوێرەی ئەو پشکنینە بێت شیاوی خواردنەوە نیە. دەشڵێت: "گەر چارەسەرێکی بۆ نەدۆزرێتەوە چەند ساڵێکی هەمومان توشی شیرپەنجە دەبین".

 

هاوکات وێنەی ئەو ئاوەیشی بڵاوکردوەتەوە کە دوای ئەوەی پشکنینی بۆ کراوە و وەک دەردەکەوێت ئاوەکە بە تەواوی رەنگی گۆڕاوە و خڵتە و رەشی تیا بەدەر کەوتوە.

 

هەروەک داواش لە لەلایەنە پەیوەندیدارەکان دەکات لە راستودروستی ئەم پشکنینە بکۆڵنەوە.

 

له‌به‌رامبه‌ردا، سامان ره‌حیم، به‌ڕێوبه‌رى به‌ڕێوبه‌رایه‌تى ئاوى كه‌لار، بۆ رادیۆى ده‌نگ ده‌ڵێت: ئه‌و كۆمپانیانه‌ى كه‌ پشكنین بۆ ئاوى ماڵان ده‌كه‌ن له‌ نێو گه‌ڕه‌كه‌كاندا توخمى نێو پێكهاته‌كانى ئاو ده‌سوتێنن بۆیه‌ ئه‌و خه‌ڵته‌ و قوڕاوه‌ دروست ده‌كات، ئه‌وه‌ی دەیکەن پشكنینى ئاو نیه‌ و جیاوازه‌.

 

وتیشى: نوسراومان ئاراسته‌ى قایمقامیه‌تى قه‌زاى كه‌لار كردوه‌ بۆ ئه‌وه‌ى رێگرى بكه‌ن له‌و كۆمپانیانه‌ و له‌ هه‌رشوێنێک بینران ده‌ستگیربكرێن و ئیجرائاتیان له‌گه‌ڵ بكرێت، چونكه‌ بونه‌ته‌ هۆى دروستكردنى دڵه‌راوكێ له‌ نێو هاوڵاتیان.

 

باسى له‌وه‌شكرد: ئەو کۆمپانیایانە بۆ ئه‌وه‌ى به‌رهه‌مه‌كانیان ساخ بكەنه‌وه‌، خۆڵ ئه‌كه‌نه‌ چاوى خه‌ڵكه‌وه‌.