ده‌نگ نێت

 

دواى 7 ساڵ هێشتا 200 مه‌ترى ماوه‌ى شەقامی پشتێنه‌یی كه‌لار ته‌واونه‌كراوه‌، سه‌رۆكى شاره‌وانى كه‌لاریش ده‌ڵێت: قه‌ره‌بوى ئه‌و 11 ماڵه‌ ته‌واو بوه‌ كه‌ ده‌كه‌وتنه‌ سه‌ر شه‌قامه‌كه‌ و چاوه‌ڕێی چۆڵكردنى خانوه‌كانیانین.

 

به‌شى سێیه‌مى شه‌قامى پشتێنه‌یی كه‌لار كه‌ له‌ فولكه‌ى شاره‌دێی گرده‌گۆزینه‌وه‌ ده‌رده‌چێت، ماوه‌ى زیاتر له‌ 7 ساڵه‌ ته‌واو نه‌كراوه‌، ئه‌گه‌رچی ته‌نها 200 مه‌تری ماوه‌، ئه‌وه‌ش به‌وهۆیه‌ى 11 ماڵ ده‌كه‌ونه‌ سه‌ر ئه‌و رێڕه‌وه‌ى بۆ شه‌قامه‌كه‌ كێشراوه‌ و ماڵه‌كانیش داواى قه‌ره‌بویان كردوه‌ له‌به‌رامبه‌ر چۆڵكردنیان.

 

به‌وته‌ى سه‌رۆكى شاره‌وانى كه‌لار، هه‌مو رێكاره‌كانى قه‌ربوكردنه‌وه‌ ئه‌و ماڵانه‌ ته‌واو بوه‌ و چاوه‌ڕوانى ئه‌وانن بۆ چۆڵكردنى خانوه‌كانیان.

 

ئه‌كره‌م ساڵح، ئاماژه‌ى به‌وه‌دا هه‌ر ماڵێك له‌و 11 ماڵه‌، به‌ زه‌ویه‌كى 200 مه‌ترى لە گەڕەکی جوتیارانی کەلار  قه‌ره‌بو كراوه‌ته‌وه‌ و هه‌مو رێكاره‌كانى پێدانى ئه‌و پارچه‌ زه‌ویانه‌ش ته‌واو بوه‌، له‌ ئێستادا چاوه‌ڕوانى ئه‌و ماڵانه‌ین كه‌ خانوەکەی سەر رێڕەوی شەوامی پشتێنەیی چۆڵبکەن بۆ ئه‌وه‌ى خانوه‌كان بڕوخێنرێن و ده‌ست به‌ پرۆژه‌كه‌ بكرێته‌وه‌ و شه‌قامه‌كه‌ ته‌واو بكرێت.