دەنگ نێت

 

بڕیار بو پرۆژەی بەهەشتی کەلار "پرۆژەی مامۆستایان" لە ۱۷/١٠/٢٠٢٢ تەواو بکرێت، بەڵام تا ئێستا تەواو نەکراوە و بەڕێوبەری وەبەرهێنانی گەرمیانیش دەڵێت: بەپێی دو نوسراو ٥ مانگ و ۲٤ رۆژمان خستوەتە سەر کاتی پرۆژەکە.

 

پرۆژەی بەهەشتی کەلار لە رێکەوتی  ١٧/١٠/٢٠١٨ دەست بەکارکردن تێیدا کراوە و ماوەی چوار ساڵ بۆ تەواو کردنی دانرابو، بەوپێیەش دەبو لە ۱۷/١٠/٢٠٢٢ کارکردن تیایدا تەواو بێت، بەڵام تا ئێستا تەواو نەکراوە و تەنها سەدا ٥٤٪ـی پرۆژەکە تەواو بوە.

 

هونەر مەحمود، بەڕێوبەری گشتی وەبەرهێنانی گەرمیان، بۆ رادیۆی دەنگ وتی: لەماوەی رابردودا دو نوسراومان بۆ هاتوە، نوسراوێکیان فەرمانی دەستەی وەبەرهێنانە کە ۱۲۰ رۆژی دیاریکردوە وەکو درێژکردنەوە، لە هەمانکاتیشدا نوسراوێکی سەرۆکایەتی دیوانی ئەنجومەنی وەزیرانمان بۆ هاتوە بە ٥٤ رۆژ قەرەبوی ئەو پرۆژانەی کردوەتەوە کە لەماوەی بڵاوبونەوەی پەتای کۆرۆنادا دروست کراون.

 

وتیشی: لەئەنجامدا بە هەردو نوسراوەکە، پێنج مانگ و ۲٤ رۆژی تر بۆ پرۆژەکە گەڕاوەتەوە و واتا کۆتا وادە بۆ تەواوکردنی ۱۲/٤/۲۰۲۳ـە.