دەنگ نێت

 

مامۆستایەکی ئاینی دەڵێت: سەرباری هەبونی بڕوانامەی پێویست، بەڵام لەوتاردان دورخراوەتەوە، بەڕێوبەری ئەوقافی گەرمیانیش دەڵێت: کاری ئەو مامۆستایە پێشنوێژییە نەک وتاردان.

 

م. عەباس ساڵح، بە رادیۆی دەنگی وت: دوای ماوەیەک لەوتاردان لە مزگەوتی ئیخڵاس (اخلاص)ـی قەزای دەربەندیخان دورخراوەتەوە و  ئەمەش دوەمجارە لەوتاردان دوردەخرێتەوە.

 

بەوتەی خۆی هۆکارەکەش وتارەکانیەتی کە "لەرێگەی پەیوەندی تەلەفۆنییەوە تائاستی قسەی زبر پێم راگەیەنراوە بەهیچ جۆرێک نابێت لەهیچ مزگەوتێک وتار بدەم، ئەمەش دوای توڕەیی و نیگەرانی وەزارەتی ئەوقاف هاتوە کە لەجێیەکی دیکەوە فشاریان لەسەرە".

 

لێدوانی ئەو مامۆستا ئاینیە لەلایەن بەڕێوبەری گشتی ئەوقافی گەرمیانەوە رەت دەکرێتەوە.

 

م.سەباح حاجی حەمەساڵح، بە رادیۆی دەنگی وت: ئەو بابەتە بەو جۆرە نیە، مزگەوتی ئیخڵاس خۆی (خطیبی) هەیە و پاش ئەوەی ناساغ بوە، ئێستا گەڕاوەتە بۆ وتاردان.

 

رونیشیدەکاتەوە: م. عەباس ساڵح بە کاتیی لەو ماوەیەدا ئەو ئەرکەی پێ سپێردراوە، چونکە ئیشی ئەو پێشنوێژیە نەک وتاردان.

 

لەبەرامبەر ئەم قسەیەدا، م. عەباس ساڵح، وتی: "ئەمە تەنها رێگریە بۆ من، چونکە م.عەبدولقادر چەند ساڵێکە  خانەنشین کراوە".

 

ئاماژەی بەوەشکرد: سەرباری ئەوەی وتاردانی لێ قەدەغە کراوە، نوێنەری ئەوقاف ئاگاداری کردوەتەوە لەپێکهێنانی لیژنەیەک لەسەری، وتیشی: "ئێستاش بەچەواشەکاری دەیانەوێت ئەو بابەتە پەردەپۆش بکەن".

 

لەبەرامبەردا بەڕێوبەری گشتی ئەوقافی گەرمیان، جەختی لەپێکهێنانی لیژنەیەک کردەوە لەسەر ئەو مامۆستا ئاینییە، بەڵام هۆکارەکەی نەخستەڕو.

 

وتیشی: ئێمە کاتێک لیژنە پێکدێنین کێشەیەک لەوتاردان هەبوبێت یان قسەیەک کرابێت کەزیانی هەبێت و یاخود قسە لەسەر ئەوقاف کرابێت.

 

لەوەڵامی ئەوەی کام لەوانە هۆکارن بۆ پێکهێنانی لیژنە لەسەر ئەو مامۆستایە، بەڕێوبەری گشتی ئەوقافی گەرمیان وتی: "دەبێت سەرەتا گوێی لێبگرین و قسەی لەگەڵ بکەین، پاشان بۆمان روندەبێتەوە".