ده‌نگ نێت - بژوێن حه‌یده‌ر

 

له‌ماوه‌ى پێشودا خوێندنى ناحكومى به‌ شێوه‌یه‌كى زۆر بره‌وى په‌یدا كردبو، به‌ڵام قه‌یرانى دارایی و كۆرۆنا بره‌وى ئه‌و جۆره‌ى خوێندنى كه‌مكردوه‌ته‌وه‌.

 

گەرمیان عەزیز، بەڕێوبەری قوتابخانەیەکی ناحکومیه‌ دەڵێت: ساڵ بە ساڵ خواست لەسەر خوێندنی ناحکومی بەرەو کەمی دەڕوات هۆكاره‌كه‌شى گەڕاندەوە بۆ قەیرانی دارایی و کۆرۆنا.

 

لە کۆی (59881) خوێندکار تەنها 0.8٪ یان، لە قوتابخانە ناحکومیەکانی کەلار ده‌خوێنن.

 

بەڕێز عەباس،  شارەزا لە بواری پەروەردە لەو بارەیەوە بە رادیۆى دەنگی وت: خوێندنگای ناحکومی  بازرگانیەکی خراپە و ئەوانەی سەرپەرشتی دەکەن ئامانجی سەرەکیان پەروەردە نییە.

 

وتیشی: خوێندنگای ناحکومی  جیاوازیەکی گەورە دروست دەکات و مرۆڤێکی میکانیکی بەرهەمدێنێ کە بارودۆخی ئابوری و سایکۆلۆژی خوێندکاری تێدا ناخوێنرێتەوە.

 

لە کەلار هەشت قوتابخانەی ناحکومی هەیە کە (590) خوێندکاریان هەیە و زۆرینەی پرۆگرامه‌كانیان وەکو قوتابخانە حکومیەکانه‌، بەڵام بە زمانی ئینگلیزی.

 

وریا محه‌مه‌د، بەڕێوبەری خوێندنگایەکی ناحکومییه‌ لەمبارەیەوە به‌ ده‌نگى وت: پڕۆژەکە لە بنەڕەتدا پڕۆژەیەکی پەروەردەیی بازرگانیە و لە پێشدا گرنگی بە پەروەردە دەدەین تاوەکو بازرگانی.

 

ئاماژه‌ى به‌وه‌شكرد: ئەگەر لایەنێکی پەروەردەیی و لایەنێکی مادی بێتە پێشەوە پەروەردەکە هەڵدەبژێرین و ئەوەش دەکەوێتە سەر خاوەن پڕۆژەکان.

 

له‌ به‌رامبه‌ردا بەڕێوەبەری گشتی پەروەردەی گەرمیان باس له‌وه‌ ده‌كات قوتابخانەی ناحکومی لە پێش حکومیەکانە، چونکە ئەوان رێژەیان کەمترە و بینا و کاتی زیاتریان هەیە. 

 

دارا ئه‌حمه‌د، وتیشی: خوێندنگا ناحکومیەکان سەرجەمیان لەلایەن پەروەردەوە سەرپەرشتی دەکرێن  کە ژمارەیان هەشت خوێندنگایە و  مۆڵەتپێدانی قوتابخانەی ناحکومیش بەردەوامە و رانه‌گیراوه‌.