رادیۆی دەنگ

 

نوێنەکردنەوەی گرێبەستی کارمەندانی باخچەکانی سنوری گەرمیان بوەتە هۆی وشکبونەوە داری دارستان و باخچەکان، بەڕێوبەری دارستان و پاوانیش دەڵێت: چەند دارێکمان بەرەو لەناوچون دەچن.

 

لەسەرەتای ئەمساڵەوە تەواوی دارستان و پاوان و نەمامگە و باخداری گەرمیان بێ خزمەت و ئاودانن و کۆمەڵێک داریش بەرەو لەناوچون رۆشتون.

 

رەشید بەکر، بەڕێوبەری بەڕێوبەرایەتی دارستان و پاوانی گەرمیان، بۆ رادیۆی دەنگ وتی: لەسەرەتای ئەمساڵەوە دارەکانی دارستانەکان و نەمامگە و باخداری سنورەکە ئاونەدراون، ئەمەش بەهۆی نوێنەکردنەوەی گرێبەستی کارمەندان لەلایەن حکومەتەوە.

 

وتیشی: نوێنەکردنەوەی گرێبەستی کارمەندان لەهەمو کوردستانە و تەنها گەرمیان نییە.

 

دەشڵێت: ئەمەش بوەتە هۆکاری سستبون و زەردبونی دارەکان و چەند دارێکیشمان بەرەو لەناوچون دەچن، ئەگەر بەمجۆرەش بەردەوامبێت ئەگەری هەیە دارستانەکان بەتەواوی لەناوبچن.

 

باسی لەوەشکرد: هیچ بەرچاوڕونیەکیش نیە کەی ئەو گرێبەستانە نوێ دەکرێنەوە و گرفتیان نامێنێت.

 

لەگەرمیاندا شەش دارستانی دەستکرد هەن (سیان لە کەلار و رزگاریی، سیان لە کفری)، فراوانترینیان کە دارستانی هەژارە، دوای بڵاوکردنەوەی ئەوەی مەترسی وشکبونی هەیە، لەلایەن بەشی باخچەکانی شارەوانی کەلارەوە دەست بە ئاودانی کرا، بەڵام دارستانەکانی تر بەبێ خزمەت ماونەتەوە.