دەنگ نێت

 

پۆلیسی گەرمیان زانیاری لەبارەی هۆکاری تەقەکردن لەو پارێزەرە دەخاتەڕو کە ئێوارەی ئەمڕۆ لەناوبازاڕی کەلار بە فیشەک بریندارکرا و دەڵێت: پەیوەندی بە کەیسێکەوە هەیە.

 

عەلی جەمال قەدوری، وتەبێژی پۆلیسی گەرمیان، بە رادیۆی دەنگی راگەیاند: بەهۆی کەیسێکی کۆنی کوشتن، شاهێدێک شایەتی داوە لەو کەیسە، دو برای کوژراوەکە ئێوارەی ئەمڕۆ تەقەیان لە پارێزەی شاهیدی کەیسەکە کردوە.

 

وتیشی: بە بڕیاری دادوەر فەرمانی دەستگیرکردن بۆ تەقەکەرەکان دەرچوە.

 

پێشتریش رزگار لەتیف، جێگری بەڕێوبەری نەخۆشخانەی فریاکەوتنی شەهید هەژار بە رادیۆی دەنگی راگەیاند: ئەو گەنجە حەوت فیشەک بە جەستەیەوە نراوە و دۆخی تەندروستی جێگیرە و لەئێستادا پزیشکان سەرقاڵی چارەسەرکردنین.

 

بەڵام لە ئێستادا وتەبێژی پۆلیسی گەرمیان باسی لەوەکرد: بریندارەکە رەوانەی سلێمانی کراوە.

 

بەپێی زانیارییەکانی رادیۆی دەنگ، گەنجەکە ناوی: هیشام سەباح حەمەجومعەیە و لە دایکبوی ۱۹۹٥ـە و پیشەی پارێزەرە.

 

ئێوارەی ئەمڕۆ، شایەتحاڵێک بە رادیۆی دەنگی وت: لەناوبازاڕی کەلار و نزیک بە قوتابخانەی لەیلاقاسم و لە بەردەم نەخۆشخانەی کەلاری تایبەت، گەنجێک دەستڕێژی گولەی لێکراوە و چەند فیشەکێکی بەرکەوتوە و برینداربوە و بۆ نەخۆشخانە گوازراوەتەوە.