دەنگ نێت

 

کارکردن لە بەرزە پردی کەلارـ رزگاری بەردەوامە، سەرۆکی شارەوانی کەلار دەڵێت: ئەگەر کێشەی پارەمان نەبێت، لە سێ مانگی داهاتودا تەواو دەبێت.

 

ئەکرەم ساڵح، سەرۆکی شارەوانی کەلار، بۆ رادیۆی دەنگ وتی:  چینی یەکەمی پردەکە قیر کراوە، ٨۰٪ـی کارەکانی تەواو بوە، دواتر چینی دوەمی قیر دەکرێت، دواتر گادرێڵ و شتەکانی سەرەوەی بۆ دروست دەکرێت بۆ ئەوەی ئۆتۆمبێل بتوانێت بەسەری دا تێپەڕبێت، پاشان یوتێرن و باڵەکانی لەخوارەوە دروست دەکرێت.

 

وتیشی: ئەگەر کێشەی پارەی نەختینەمان نەبێت، لە سێ مانگی داهاتودا بەرزە پردەکە تەواو دەبێت.

 

بەرزە پردەکە درێژییەکەی ٩٠٠ مەترە، رێگای کەلار- رزگاری و شەقامی پشتێنەیی کەلاری لەسەرە و یەکەم بەرزە پردە لە سنوری ئیدارەی گەرمیان.

 

تێچوی پردەکە سێ ملیۆن و ٢٠٠ هەزار دۆلارە، ٢ ملیۆنی لەلایەن وەبەرهێنەر: حەسەن محەمەد تاڵەبانییەوە دراوە لەبەرامبەر پێدانی زەوییەک پێی لەناوبازاڕی کەلار و کردنی بە مۆڵێک، باقی تێچونەکەش (ملیۆن و ٢٠٠ هەزار دۆلار) لە ژمارەیەک پرۆژەی دیکەی وەبەرهێنان وەردەگیرێت.