دەنگ نێت

 

دواى ئه‌وه‌ى ئاسایشى گەرمیان ده‌ستبه‌سه‌راگرتنى سەروی ١٠٠ ماتۆڕسكیلى بێسه‌ره‌تای لەسنورى ئیداره‌ى گه‌رمیان راگەیاند، وته‌بێژى هاتوچۆى گه‌رمیان ده‌ڵێت: تاوه‌كو ئێستا ئه‌و ماتۆڕسكیلانه‌ راده‌ستى ئێمه‌ نه‌كراوه و نازانین رادەستمان دەکرێت.‌

 

له‌ هه‌فته‌ى رابردودا و لە‌ لێدوانێكیدا بۆ رادیۆى ده‌نگ، عه‌قید: سه‌لام عەبدولخالق، بەڕێوبەری راگەیاندن و پەیوەندییەکانی دەزگای ئاسایشی هەرێم، وتى: هه‌ڵمه‌تی دەستبەسەراگرتنی ماتۆڕسکیل لە سنوری گەرمیان کە لەلایەن ئاسایشی گەرمیانەوە جێبەجێ دەکرێت، تیایدا سەروی ١٠٠ ماتۆڕسکیل دەستیان بەسەرداگیراوە کە بێسەرەتان و خاوەنەکانیان هەستاون بە دەستکارییکردنی مەکینە و ئەکزۆزەکانیان و دەنگیان زیاد کردون و هاوڵاتیانیان بێزار کردوە.

 

له‌ به‌رامبه‌ردا، سامان عه‌لى، وته‌بێژى به‌ڕێوبه‌رایه‌تى هاتوچۆى گه‌رمیان له‌باره‌ی ئەوەی ماتۆڕسکیلە دەستبەسەراگیراوەکان رادەستیان کراوە؟‌ بۆ رادیۆى ده‌نگ باسى له‌وه‌كرد: تاوه‌كو ئێستا ئه‌و ماتۆڕسكیلانه‌ راده‌ستى ئێمه‌ نه‌كراوه‌ له‌لایه‌ن به‌ڕێوبه‌رایه‌تى ئاسایشى گه‌رمیانه‌وه‌.

 

جه‌ختى له‌وه‌شكرده‌وه‌: هیچ زانیارییه‌ك له‌ ئارادا نیه‌ له‌ ئێستا ئه‌و ماتۆڕسكیلانه‌ راده‌ستى ئێمه‌ ده‌كرێت یاخود نا.