دەنگ نێت

 

بەڕێوبەرایەتی کشتوکاڵی گەرمیان داوا لە جوتیاران دەکات جاڕەکانیان نەسوتێنن، دەشڵێت: ئەو کارە زیانی زۆری هەیە بۆ کێڵگەکان.

 

لە بڵاوکراوەیەکدا کە ئاراستەی جوتیارانی گەرمیانی کردوە، بەڕێوبەرایەتی گشتی کشتوکاڵی گەرمیان دەڵێت: له‌ دواى ئه‌نجامدانى پڕۆسه‌ى دروێنه‌ى كێڵگه‌ کشتوكاڵیەكانى گه‌نم وجۆ، ديارده‌ی سوتاندنى پاشماوه‌كانى دواى دروێنه‌ لەلایەن بەشێک له‌ جوتیارانەوە بەدی دەکرێت، گوايه‌ به‌ مه‌بەستى پاكکردنه‌وه‌ى زه‌وييه‌كانيان له‌ ده‌غڵ و پوش.

 

دەشڵێت: ئه‌م كاره‌ ده‌بێته‌ هۆى پيسبونى ژينگه‌ و له‌ناوچونى خه‌سڵه‌ته‌كانى بەپیتی خاک، جگە لەوەی هەندێک جاریش زیانی گەورەی لێدەکەوێتەوە.

 

هەروەک رێنمایی جوتیارانیش دەکات بەوەی ‌ باشتر وايه‌ پاشماوه‌كان بمێننەوە و لە ساڵی چاندنی داهاتودا لەگەڵ کێڵانی زەوی دا تێکەڵ بە خاک ببێت، بەمەش دەبێتە هۆی پارێزگاری لە بەپیتی خاک و خه‌سڵه‌تی کێڵگەکان.

 

ئەم بڵاوکراوەیەش دوای ئەوەهات کە لەگەڵ هاتنی هاوین و تەواوبونت دروێنەدا حاڵەتەکانی سوتانی جاڕ و لەوەڕگا لە سنوری گەرمیان زیاد دەکە ، ئەگەرچی بەڕێوبەرایەتی بەرگری شارستانی ئاماژە بەوەدەکات هۆکاری روداوەکان نەزانراون، بەڵام گومان دەکرێت هەندێکجار جوتیاران خۆیان ئەو کارە بکەن بە پاساوی پاککردنەوە و بە پیتکردنی کێڵگەکانیان.