ده‌نگ نێت

 

دروستکەری پردی قەرەچەم لە گەرمیان ئاماژە بە مەترسیداریی هاتوچۆکردن بە پردەکەدا دەدات بەوهۆیەی مەترسی روخانی لەسەرە، دەشڵێت: بۆ ئەوەی توشی هیچ شتێکی یاسایی نەبین، ناچار دەبین پردەکە دابخەین.

 

پردی قەرەچەم، چه‌ند ساڵێكه‌ له‌ نزیك ناحیه‌ى باوه‌نورى سه‌ر به‌ كه‌لار لەلایەن کارگەیەکی چەولمەوە دروستکراوە، درێژیه‌کەی ٦۰ مەترە، یەک ئاڕاستەیە و و بوه‌ به‌ رێگای هاتوچۆی ۲۰ گوندی ناوچەكه‌، به‌شێوه‌یه‌ك ئه‌مبه‌رى سیروانى به‌و به‌ره‌وه‌ به‌ستوه‌تەوە و زۆرێک لە گوندنشینان بەو پردەدا هاتوچۆ دەکەن بەهۆی نەبونی پردی دیکە و نزیک لەو سنورەدا.

 

زۆراب وەهاب، دروستکەری پردەكه‌، بۆ رادیۆی دەنگ وتی: بەهۆی زیاتر لە ۱٨ مانگە ناهێڵن غەسالەکان کاربکەن، ژێری پردەکە پاک نەکراوەتەوە، کە پاکیش نەکرێتەوە ئاو بەسەنتەر ناڕوات بەژێر پردەکە.

 

وتیشی: کە ئاو بەلایەکی پردەکەدا دەڕوات و سەنتەر نابێت، ئەوکات ژێر پایەکانی چۆڵ دەبێت، ئەمەش دەبێتە هۆی مەترسی روخانی.

 

"۳۰ پایە لە ژێر پردەکە جێگیر کراون و بە کۆمپرێسەر داکوتراون، بە تێکڕا نزیکەی ٨ بۆ ۱۲ مەترن و زۆر نەچون بە ناو زەوی دا" زۆراب وای وت.

 

باسی لەوەشكرد: پێشتر نیشانەیەکمان دانابو، بەڵام ئێستا بەو نیشانەوە دەزانین چوار بۆ پێنج مەتر قوڵ بوە، بەهۆی ئەوەی ئاوەکە بەسەنتەر ناڕوات بەژێریدا.

 

وتیشی: ئەگەر چارەسەر نەکرێت رۆژێک دێت دەڕوخێت.

 

پردەکە ئه‌گه‌رچی نزیكه‌ له‌ ناحیه‌ى باوه‌نورەوە، به‌ڵام له‌روى ئیداریەوه‌ سەر بەناحیەی مەیدانە، بەوتەی دروستکەری پردەکە: رۆشتون بۆ لای لایەنە پەیوەندیدارەکان، بەڵام تاوەکو ئێستا ئەنجامی نەبوە، 

 

وتيشى: بۆ ئەوەی توشی هیچ شتێکی یاسایی نەیەین، ناچار دەبین پردەکە دابخەین.