دەنگ نێت

 

به‌ڕێوبه‌رى گشتى ته‌ندروستى گه‌رمیان ده‌ڵێت: ٨ مانگە پارەمان بۆ خەرج نەکراوە بەمەبەستی کڕینی دەرمان و پێداویستی، بۆ ٥ مانگی ئەمساڵیش حکومەت ره‌زامه‌ندى لە خه‌رجكردنى ٤٦٠ ملیۆن دینار داوە.

 

د.سیروان محه‌مه‌د، به‌ڕێوبه‌رى گشتى ته‌ندروستى گه‌رمیان، بۆ رادیۆى ده‌نگ وتى: به‌ڕێوبه‌رایه‌تیمان ساڵانه‌ ته‌رخانكراوى خۆمان هه‌یه‌ بۆ كڕینى ده‌رمان و پێداویستى پزیشكى و تاقیگەیی، بۆ ٥ مانگى سه‌رەتاى ئه‌مساڵیش ره‌زامه‌ندى خه‌رجكردنى بڕى ٤٦٠ میلۆن دینارمان بۆ هاتوه‌ته‌وه‌، هه‌ر به‌ گه‌یشتنى ره‌زامه‌ندیه‌كه‌ كۆبونه‌وه‌مان ئه‌نجامداوه‌ و به‌ رێژه‌ى دابه‌شمان كردوه‌.

 

وتیشى: بۆ ماوه‌ى زیاتر له‌ ٨ مانگه‌ هیچ بڕه‌ ده‌رمان و پێداویستیه‌كمان نه‌كڕیوه‌، هۆكاره‌كه‌شى ئه‌وه‌بو هیچ ته‌رخانكراوێكمان نه‌بوه‌ و حكومه‌تیش هیچ بڕه‌ پاره‌یه‌كى بۆ دابین نه‌كردوین.

 

هێماى بۆ ئه‌وه‌شكرد: ئه‌و بڕه‌ پاره‌شى كه‌ ره‌زامه‌ندى بۆ هاتوه‌ته‌وه‌ رێژه‌كه‌ له‌ پار زیاتره‌، چونكه‌ پێشتر بڵاومان كرده‌وه‌ كه‌ بڕى ٢ ملیار دینارمان بۆ زیاد كراوه‌، پار ساڵ بڕه‌كه‌ ٢٥٠ ملیۆن دینار بوه‌ به‌هۆى ئه‌و زیادكردنه‌وه‌ بوه‌ به‌ ٤٦٠ ملیۆن دینار.