دەنگ نێت

 

به‌هۆى قه‌ره‌بونه‌كردنه‌وه‌ى 5 ماڵه‌وه‌، تاوه‌كو ئێستا نه‌توانراوه‌ 200 مه‌تر جادەی پشتێنه‌ى كه‌لار بە دیوی گرده‌گۆزینه‌ ته‌واو بكرێت، سه‌رۆكى شاره‌وانى كه‌لاریش ده‌ڵێت: ئه‌و ماڵانه‌ له‌ رێكارى وه‌رگرتنى قه‌رەبوەكانیاندان.

 

ئه‌كره‌م ساڵح، سه‌رۆكى شاره‌وانی كه‌لار، له‌مباره‌یه‌وه‌ بۆ رادیۆى ده‌نگ وتى: ئه‌و ماڵانه‌ى به‌ر ئه‌و جاده‌یه‌ كه‌وتون 11 ماڵن، 6یان قه‌رەبوه‌كانیان وه‌رگرتوه‌ و خانوه‌كانیان روخاندوه‌، ئه‌وه‌ى ماوه‌ته‌وه‌ 5 ماڵن له‌ ئێستادا له‌ رێكارى ته‌واوكردنى مامه‌ڵه‌كانیانن له‌ ئیداره‌ى گه‌رمیان و شاره‌وانیه‌كانى گه‌رمیان بۆ وه‌رگرتنى قه‌رەبوه‌كانیان و زه‌ویان بۆ ته‌رخان بكه‌ین.

 

وتیشى: بۆ ماوه‌ى 4 ساڵه‌ به‌هۆى ئه‌و ماڵانه‌وه‌ نه‌توانراوه‌ ئه‌و رێگه‌یه‌ ته‌واو بكرێت كه‌ ته‌نها 200 مه‌تر جادەی ماوه‌.

 

جه‌ختى له‌وه‌شكرده‌وه‌: له‌ دواى قه‌ره‌بوكردنه‌وه‌ى ئه‌و ماڵانه‌ راسته‌وخۆ ده‌ست ده‌كه‌ین به‌ كاركردن له‌و رێگه‌یه‌ و تەواوکردنی.

 

ئەو رێگەیە بەشی سێیەمی جادەی پشتێنەیی کەلارە کە جادەکە دەباتە سەر فولکەی گوندی گردەگۆزینە و نزیکەی 8 ساڵ پێش ئێستا دەست بەکارکردن کرا تیایدا.