دەنگ نێت

 

سەرپەرشتیاری کارگوزارانی نەخۆشخانەی گشتی کەلار دەڵێت: دەستمان بەکارکردن نەکردوەتەوە و  حکومەت نزیکەی ٨٠ ملیۆن  دینار موچەی کارگوزارانی لایە.

 

پاش نزیکەی هەفتەیەک لە نەبونی کارگوزار لە نەخۆشخانەکانی گەرمیان، هێشتا نەگەڕاونەتەوە بۆ کارەکانیان و نەخۆشخانەکان لە رێگەی خێرخوازەوە پاکدەکرێنەوە.

 

عەزیز عوسمان، سەرپەرشتیاری کارگوزارانی نەخۆشخانەی گشتی کەلار بە رادیۆی دەنگی وت: ژمارەی ئێمە ٥٠ کارگوزارە، تاوەکو ئێستا نەیانتوانیوە بگەڕێنەوە بۆ کارکردن و  تەندروستی گەرمیانیش لەوبارەیەوە ئاگاداری نەکردونەتەوە.

 

باسی لەوەکرد: نزیکەی ٨٠ ملیۆن دیناریان لای حکومەتە کە موچەی مانگەکانی ٢ و ٣ـی ئەمساڵن و تاوەکو ئێستا بۆیان خەرج نەکراوە.

 

سەرەتای هەفتەی رابردو کارگوزاری نەخۆشخانەکانی گەرمیان ئاگادارکرانەوە لەوەی چیتر پارەیان بۆ خەرج ناکرێت و کارەکانیان جێبهێڵن، ئەمەش بەهۆی خەرج نەکردنی موچەکانیان لە تەندروستی گەرمیانەوە کە پێشوتر بە تەندەرین و لە رێگای کۆمپانیاوە موچەیان پێدەدرا.