ئه‌مڕۆ (6ـى ئابی 2022) له‌كاتى روماڵی خۆپیشاندانی قه‌زاى كه‌لار، په‌یامنێرمان (محه‌مه‌د مه‌حمود) له‌لایه‌ن هێزه‌كانى ئاسایشه‌وه‌ ده‌ستگیر كرا، له‌كاتێكدا خۆی پێناساندون و باجی كاركردنى پێبوه‌، كه‌چى توندوتیژانه‌ به‌ لێدان و جنێو و قسه‌ى نه‌شیاو به‌ ده‌ستگیركراوى بۆ یاریده‌ده‌رێتى ئاسایشی كه‌لاریان بردوه‌ و به‌هه‌مان مامه‌ڵه‌وه‌ له‌وێوه‌ ره‌وانه‌ى به‌ڕێوبه‌رایه‌تى ئاسایشی گه‌رمیان كراوه‌ و كه‌له‌پچه‌ كراوه‌ته‌ ده‌ستى و فشاری لێكراوه‌ بۆ واژوكردنى به‌ڵێننامه‌یه‌ك، به‌ڵام ئاماده‌ نه‌بوه‌ و واژوى نه‌كردوه‌.

 

دواى راگرتنى له‌م دۆخه‌دا بۆ ماوه‌ى زیاتر له‌ 3 كاتژمێر، دواتر ئازاد كراوه‌.

 

ئێمه‌ به‌ توندى ئیدانه‌ى ئه‌م ره‌فتاره‌ى هێزه‌كانى ئاسایش ده‌كه‌ین و پێیانوایه‌ به‌م كاره‌یان په‌ڵه‌یه‌كى شه‌رمه‌زارییان سه‌رباری ره‌فتاره‌كانیان كرد. داواش له‌ پارله‌مان و ده‌سه‌ڵاتى دادوه‌ری و داواكارى گشتى و لایه‌نه‌ حكومیه‌كان و هه‌روه‌ها رێكخراوه‌كانى پاراستنى مافی مرۆڤ و رۆژنامه‌نوسان ده‌كه‌ین له‌ ئاست ئه‌م بێڕێزى و توندوتیژی و ره‌فتاره‌ نه‌شیاوه‌ى ئاسایش به‌ ده‌نگ بێن و لێپێچینه‌وه‌ بكه‌ن.

 

 

رادیۆی ده‌نگ

6ـى ئابی 2022