رادیۆی ده‌نگ- محه‌مه‌د مه‌حمود
دوکەڵی کارگەیەکی ئاسن لە سنورى ناحیه‌ى سەرقەڵا، ئاسمانى ناوچه‌كه‌ى ته‌ڵخ كردوه و بێزاریی هاوڵاتیان و چالاكوانانیشی به‌دوای خۆیدا هێناوه، چالاکوانێک دەڵێت: مرۆڤ سەیری دوکەڵەکەی بکات دەزانێت خراپە، بەڕێوبەری فه‌رمانگه‌ى ژینگەی گەرمیانیش دەڵێت: کەمتر لەمانگێکی ماوە بۆ تەواوبونی مۆڵەتەکەی، بەرپرسێک لە کارگەکەش دەڵێت: پێش ئەو وادەیەی دیاریکراوە کێشەی ئەو دوکەڵە چارەسەر دەکەین.
کارگەی قەیوان ستیل، کارگەیەکی بەرهەمهێنانی ئاسنە، دەکەوێتە سنوری ناحیەی سەرقەڵای سەر بە قەزای کفری. بەپێی چەند گرتە ڤیدیۆییەک کە پێشتر رادیۆی دەنگ بڵاویکردوەتەوە، دوکەڵێکی زۆر له كارگه‌كه‌وه ده‌رده‌چێت و تێكه‌ڵ به ئاسمانى سنوره‌كه ده‌بێت.
چالاکوانێک: دەبو پێش ئەوەی دەستبەکار بوایە کێشەی دوکەڵەکە چارەسەر بکرایە
ئەیاد محەمەد، چالاکوان لە گەرمیان، له‌باره‌ى كێشه‌ى ئه‌و كارگه‌یه‌وه بۆ رادیۆی دەنگ وتی: ئەو دوکەڵە لەڕوی ژینگە و تەندروستییەوە کاریگەرییەکی خراپی هەیە، ئێمە لەهەوڵی ئەوەداین ئەو دوکەڵە رابگیرێت، هەرچەندە دەبو ئەو کارگەیە پێش ئەوەی دەستبەکار بکات هەمو بابەتی ئەو دوکەڵەی چارەسەر بکردایە و ئەو ئامێرانەی ببەستایە کە رێگربون لە پیسبونی ژینگە، بەڵام ئەو کارەی نەکرد.
وتیشی: لەوڵاتانی تر کارگە دروستدەکرێت، بەڵام بەم شێوەیەی ئەمان کار ناکات و ژینگە پیس ناکات، لێپرسینەوە و چاودێریکردن هەیە، لێرەش حکومەت پێکنەهێنراوە و ئەنجومەنی پارێزگای سلێمانی هەڵوەشاوەتەوە، ئەمانەش کاریگەری هەیە.
دەشڵێت: پێش ئەوەی دەستبەکارکردن بکات پێویستە چارەسەر بکرێت، چونکە مرۆڤ کە دوکەڵەکە دەبینێت دەزانێت خراپە.
بەڕێوبەری کارگەکە: سیسته‌مى فیلته‌رى بۆ داده‌نێین
کامەران عوسمان، به‌ڕێوبه‌رى كارگه‌ى قه‌یوان ستیل، له‌باره‌ى ئه‌و كێشه‌یه‌وه به رادیۆی ده‌نگى وت: کارمان کردوە بۆ چارەسەرکردنی له رێگه‌ى دانانى سیسته‌مى فیلته‌ره‌وه كه وه‌كو دوكه‌ڵكێشه، ئێستا 50%ـى سیسته‌مه‌كه بەستراوە، هەندێک بابەتی ماوە هێشتا نەگەیشتوەتە دەستمان، له‌م ماوه‌یه‌دا دەگات و دواكه‌وتنیشی په‌یوه‌ندی به پشوه‌كانى نه‌ورۆز و "13 به‌ده‌ر"ـه‌وه بوه.
وتیشی: کارگە لە تاقیكردنه‌وه دایه و تاوەکو ئێستا یەک فڕنمان تێستکردوە، پێشوتر ته‌نها به‌شى رواڵین له كارگه‌كه کاریدەکرد، ئەوەش دوکەڵکێشی ناوێت، چونکە دوکەڵی نەدەکرد، بەڵام ئێستا بەشی توانەوەکەی کاردەکات ئەمیش تێستە و فڕنی یەکەمە.
بەوتەی بەڕێوبەری کارگەکە، لەهەوڵێکی زۆردان بۆ ئەوەی کەمتر لە مانگێک كارى به‌ستنى فیلته‌رى دوكه‌ڵی كارگه‌كه تەواوبێت.
له‌باره‌ى ئه‌وه‌ى بۆچی كارگه‌كه ناوه‌ستێنن هه‌تا فیلته‌ره‌كه‌ى بۆ داده‌نێن؟ كامه‌ران عوسمان وتى: کرێکارێکی زۆری دەڤەرەکە لەو کارگەیە کار دەکەن، راگرتی ئەوەش کرداری خراپی لێدەکەوێتەوە، جگە لەوەش 70 شۆفێریش کاردەکەن و سود دەبینن لە کارگەکە.
فه‌رمانگه‌ى ژینگە: چاره‌سه‌ر نه‌كرێت رێکاری یاسایی دەگرینه‌به‌ر
د. دورەید سەلیم، بەڕێوبەری فەرمانگەی ژینگەی گەرمیان، له‌باره‌ى كێشه‌ى ئه‌و كارگه‌یه‌وه، بۆ رادیۆی دەنگ وتی: تیمی پشکنین و چاودێریی ئێمە سەردانی کارگەکەیان کردوە و ئاگادارکردنەوەیان پێداون، ئەوانیش لەرێگای تیمی پارێزەریانەوە له‌كۆتایی مانگى یه‌كى ئه‌مساڵ سه‌ردانیان كردوین و داوای مۆڵەتی کاتییان کردوە لە چوارچێوەی یاساو رێنماییەکان.
وتیشی: مۆڵەتەکەیان بۆ ماوەی 3 مانگە و ئێستا مانگێكیان ماوه و دەبێت له‌ماوه‌ى ئه‌و مانگه‌دا كێشه‌كه چارەسەر بکه‌ن.
جه‌ختیشیكرده‌وه نوسراویان ئاڕاستەی قایمقامیەتی قەزای کفری و بەڕێوبەرایەتی ناحیەی سەرقەڵا کردوە، بۆ ئه‌وه‌ى ئەگەر گرفته‌كه چارەسەر نەکرا، رێکاری یاسایی بەرامبەر كارگه‌كه بگیرێتەبەر.
- دوایین بابەتەکان
-
هەواڵدۆسیەی فرۆشتنی زەوی لەلایەن شارەوانی کفرییەوە بە قەدەغەکراویی ماوەتەوە
-
-
راپۆرتچەقۆ، مەترسییەک لەسەر گەردنی گەنجانی گەرمیان
-
-
هەواڵداواکاری گشتی گەرمیان سکاڵا لەسەر کارگەیەک دەجوڵێنێت
-
-
بەرنامەمەترسیی و لێکەوتەکانی پاشماوەی پاتری بۆسەر ژینگە
-
-
بەرنامەشانۆ چۆن ده‌توانێت خزمه‌ت به بوارى رۆشنبیریی له گه‌رمیان بكات؟
-
زۆرترین بینراوەکان
