رادیۆی دەنگ

 

بڕیارە سبەینێ بزوتنەوەی گۆڕان لە گردی زەرگەتەی سلێمانی کۆنفرانسی گشتی ببەستێت، بۆ بەشدارییکردنیش تیایدا مەکۆی کەلاری ئەو حیزبە بون بە دو بەشەوە، سکرتێری مەکۆکە دەڵێت: ٥۰ کەس لەگەرمیانەوە دەڕۆین و بەشدار دەبین لە کۆنفرانسەکە، باژێڕوانی مەکۆکەش دەڵێت: کۆنفرانسەکە ناشەرعییە و زۆرینە لای ئێمەیە.

 

سەرکەوت کەریم، سکرتێری مەکۆی کەلاری بزوتنەوەی گۆڕان، بەرادیۆی دەنگی راگەیاند: سبەینێ ٥۰ کەس لە گەرمیانەوە بەشداری کۆنفرانسەکە دەکەین کە کۆمیسیۆنی باڵای سەربەخۆی هەڵبژاردنەکانی عێراق دیاریکردوە.

 

وتیشی: ئەو پەنجا کەسە زۆرینەی مەکۆکەین و زیاتر بازنە و رایەڵەکانی حیزبەکەمانن لە گەرمیان.

 

دەشڵێت: کۆنفرانسەکە لەژێر چاودێریی کۆمیسیۆنی باڵای سەرخۆی هەڵبژاردنەکانی عێراقە و بەبڕیاری کۆمیسیۆن رۆژ و شوێنەکەی دیاریکراوە.

 

لە بەرامبەردا، مەریوان رەحیم، باژێڕوانی مەکۆی کەلاری بزوتنەوەی گۆڕان، بە رادیۆی دەنگی راگەیاند: ئێمە بەشداری کۆنفرانسی ناشەرعیی ناکەین و تەقدیمان کردوە بۆ کۆنفرانس بۆ ئەوەی لە ۱۰ـی مانگ ئەنجامی بدەین.

 

وتیشی: بەتەلەفۆن هەواڵ بەهەردولامان دراوە نابێت سبەی کۆنفرانس بکرێت، چونکە سبەینێ کۆمیسیۆن بەشدار نابێت.

 

بەپێی وتەی باژێڕوانی مەکۆی کەلاری بزوتنەوەی گۆڕان "ئەوان (مەبەستی باڵی گردی زەرگەتەیە) لە بانگهێشتی کۆنفرانسەکەدا نوسیویانە هاتن بۆ هەموانە، ئاخر کۆنفرانس کەی وادەبێت؟ ئێمە ۲۲۰۰ ناوی شەرعیمان هەیە ئەبێت ئەم ناوانە بەشدار بن نەک هەرکەسێک بێت و بەشداربێت".

 

دەشڵێت: ئەگەر کۆمیسیۆن سبەی بەشدار نەبێت لە کۆنفرانسەکەیان ئەوا ناشەرعییە، ئەگەریش کۆمیسیۆن بەشداربێت، ئەوکات قسەی خۆمان دەبێت.

 

باڵی گردی زەرگەتەی بزوتنەوەی گۆڕان رایگەیاندوە کە سبەی شەمە (٥ـی نیسانی ٢٠٢٥) کۆنفرانسی گشتی ئەنجام دەدات بە چاودێریی کۆمیسیۆنی باڵای هەڵبژاردنەکانی عێراق، لەبەرامبەردا باڵی کوردساتی بزوتنەوەکە رایدەگەیەنێت ئەو کۆنفرانسە ناشەرعییە و ئەوان بە چاودێریی کۆمیسیۆن لە رۆژی (١٠ـی نیسانی ٢٠٢٥) کۆنفرانس ئەنجامدەدەن.