رادیۆی دەنگ 

 

داواکارێکی گشتی لە گەرمیان لەسەر دوکەڵی کارگەی ئاسنەکەی سەرقەڵا سکاڵا دەجوڵێنێت و داوا دەکات رێنماییەکانی ژینگەی بەسەردا جێبەجێ بکرێت.

 

بەپێی نوسراوێک کە ئەندامێکی داواکاری گشتی گەرمیان بۆ دادگای لێکۆڵینەوەی کەلاری ناردوە، هاتوە: دوابەدوای پێدانی زانیاری و پێشکەشکردنی سێ پارچە ڤیدیۆی تۆمارکراوی تایبەت بە کارگەی قەیوان ستیل لە سنوری ناحیەی سەرقەڵا، دەردەکەوێت بەهۆی کارەکەیەوە دوکەڵێکی رەشی بێزارکەر دەردەکات و بوەتە هۆی پیسکردنی ژینگەی ناوچەکە.

 

ئاماژە بەوەشکراوە کە ئەمەش پێچەوانەی رێنماییەکانی ژینگە و یاسای پاراستن و چاککردنی ژینگەی هەرێمی کوردستان ژمارەی ٨ـی ساڵی ۲۰۰٨ وەک لەمادەکانی (۱ بڕگەی ۹، ۲٥ و ٢٦)ـدا هاتوە.

 

داواکاری گشتی گەرمیان لە نوسراوەکەدا داوا دەکات رێکاری یاسایی بگیرێتە بەر بەرامبەر بە کارگەکە بەپێی مادەی ٤۲ لەیاسای چاککردن و پاراستنی ژینگە.

 

کارگەی قەیوان ستیل، کارگەیەکی بەرهەمهێنانی ئاسنە، دەکەوێتە سنوری ناحیەی سەرقەڵای سەر بە قەزای کفری، گرفتی کارگەکە دوکەڵێکی زۆرە کە له‌ كارگه‌كه‌وه‌ ده‌رده‌چێت و تێكه‌ڵ به‌ ئاسمانى سنوره‌كه‌ ده‌بێت، بەپێی وتەی چالاکوانانیش دوکەڵەکە زیانی زۆری بۆ ژینگە و تەندروستی هاوڵاتیان دەبێت.

 

بەپێی راپۆرتێکی پێشوتری رادیۆی دەنگ، فەرمانگەی ژینگەی گەرمیان ماوەی سێ مانگیان بۆ کارگەکە دیارییکردوە بۆ چارەسەرکردنی ئەو کێشەیە کە ئێستا کەمتر لە مانگێک بۆ ئەو مۆڵەتەیان ماوه‌. بەڕێوبەری کارگەکەش باسی لەوەکردوە کەرەستەکانی سیستەمی فیلتەری کارگەکەیان هێناوە و لە ماوەی مانگێکدا چارەسەری دەکەن.