دەنگ نێت

 

دوای ئەوەی نوێنەری مانگرتوانی کفری لەسەر زاری وەزیری خوێندنی باڵاوە بڵاویکردەوە کە بڕیاردراوە سەرۆکایەتی زانکۆی پۆلیتەکنیکی گەرمیان ببرێتە کفری، ژمارەیەک مامۆستا و چالاکوانی ناحیەی رزگاریی ناڕەزایەتییان دەربڕیوە.

 

د. یادگار عەلی- مامۆستای زانکۆ، لەوبارەوە نوسیویەتی: دەبێت سەرۆکایەتی زانکۆی پۆلیتەکنیکی گەرمیان لە ڕزگاری بێت و ناحیەی رزگاری کراوەتە قوربانی لە نێوان کەلار و کفری!

 

هاوکات، بەختیار رەئوف- چالاکوان، نوسیویەتی: رێگە نادەین زانکۆی پۆلەتەکنیکی گەرمیان بگوازریتەوە جێگە و شارێکی تر، چونکە پێشتر بڕیار بوە لە رزگاری بێت و جێگەی بۆ دیاریکراوە و بڕیاری لەسەر دراوە.

 

هاوکات دەستەیەک بەناوی چین و توێژەکانی ناحیەی رزگارییەوە لەسەر هەمان پرس بەیاننامەیەکیان بڵاوکردوەتەوە، کەتیایدا دەڵێن: لەڕێگەی ئەم بەیاننامەیەوە ناڕەزایەتی تووندی خۆمان بەرامبەر بەو دەنگۆیانە دەردەبڕین و هۆشیاری تووند دەدەین کە لەژێر هەر ناو و ناونیشانێک و بۆ هەر مەرامێک و لە ژێر هەر فشارێک بویسترێت ئەو بڕیارە بگۆڕدرێت، ئێمەی دانیشتووانی ڕزگاریی بەتەواوی چین و توێژەکان هەڵوێستمان دەبێت و ئەوە قبوڵناکەین.

زانکۆی پۆلیتەکنیکی گەرمیان لە ٦ـی تەموزی ئەمساڵدا لە مەراسیمێکدا لە قەزای کەلار راگەیەنرا، تائێستا بینای تایبەت بەخۆی نییە و پێشتر چالاکوانانی قەزای کفری داواینکردبو سەرۆکایەتییەکەی لە قەزاکەی ئەواندا بێت، ئەگەرچی زەویی لە ناحیەی رزگاریی سەر بە کەلار بۆ دیاریی کرابو.