ده‌نگ نێت
كارمه‌ندانى نه‌خۆشخانه‌ى قه‌ڵا له كه‌لار دو رۆژه مانیان له‌ده‌وام گرتوه و ده‌ڵێن هه‌تا موچیه‌یان بۆ نه‌كرێته مانگانه ده‌وام ناكه‌نه‌وه.
رێبین ئه‌حمه‌د، كارمه‌ندى به‌شى نه‌خۆشخانه‌ى قه‌ڵا له كه‌لار به رادیۆی ده‌نگى وت: ئێمه 70 كارمه‌ندین كه له‌سه‌ر بودجه‌ى ئیداره‌ى گشتى یه‌كێتى نیشتمانى كوردستان موچه‌مان بۆ خه‌رج ده‌كرێت، به‌ڵام له‌مساڵدا ته‌نیا یه‌ك موچه‌مان بۆ خه‌رج كراوه و ساڵی پاریش به تێكڕا 7 موچه‌مان پێدرا، بۆیه ده‌ستمان به مانگرن كردوه و له‌دوێنێوه نه‌چوینه‌ته نه‌خۆشخانه‌كه.
به‌وته‌ى خۆیشی: به‌وهۆیه‌وه كاره‌كانى نه‌خۆشخانه‌كه په‌كی كه‌وتوه، ئه‌وانیش هه‌تا به‌ڵێن وه‌رنه‌گرن له‌وه‌ى موچه‌كانیان به مانگانه پێده‌درێت، ئاماده نین بگه‌ڕێنه‌وه سه‌ركار.
ئه‌و كارمه‌ندانه له‌كاتى سه‌رهه‌ڵدانى كۆرۆنا و دروستكردنى نه‌خۆشخانه‌ى قه‌ڵا بۆ روبه‌ڕوبونه‌وه‌ى كۆرۆنا، وه‌كو خۆبه‌خش تیایدا ده‌ستبه‌كار بون، دواتر ئیداره‌ى گشتى یه‌كێتى نیشتمانى مانگانه بڕى نزیكه‌ى 70 ملیۆن دینارى بۆ خه‌رج ده‌كردن، پاشان بودجه‌كه‌ى كه‌مكرده‌وه بۆ 35 ملیۆن دینارى مانگانه.
نه‌خۆشخانه‌ى قه‌ڵا له ساڵی 2020 له‌لایه‌ن خێرخوازانه‌وه دروستكراوه و ئه‌گه‌رچی به "نه‌خۆشخانه" ناوده‌برێت، به‌ڵام تائێستا به فه‌رمی نه‌كراوه به‌نه‌خۆشخانه و هێشتا به‌شێكه له نه‌خۆشخانه‌ى گشتى كه‌لار، پێشتر نه‌خۆشانى كۆرۆناى تێدا داخل ده‌كرا، پاش كۆتاییهاتنى شه‌پۆلی كۆرۆناش، ته‌رخانكراوه بۆ داخلكردنى نه‌خۆشی هه‌ناوى و مناڵان.
زۆرترین بینراوەکان
