ده‌نگ نێت

 

چالاكوانێك له‌ هه‌ولێر له‌لایه‌ن دو چه‌كدارى نه‌ناسراوه‌وه‌ هێرشى ده‌كرێته‌ سه‌ر و دو چه‌كداره‌كه‌ پێیان وتوه‌ ده‌بێت واز له‌ زمان درێژى بهێنێت.

 

رۆژنامه‌نوس، نیاز عه‌بدوڵا، له‌په‌ڕه‌ى خۆى له‌ تۆڕى كۆمه‌ڵایه‌تى فه‌یسبوك بڵاویكردوه‌ته‌وه: كه‌ شه‌وى رابردو دوو چه‌كدارى نه‌ناسراو هێرشیان كردوه‌ته‌ سه‌ر رۆژنامه‌نوس و چالاكوان هاوڕێ كوردى و برینداریان كردوه‌ و پێیان وتوه‌ كه‌ واز له‌ زماندرێژى بهێنێت.

 

‌شه‌وى رابردو رۆژنامه‌نوس و چالاكوان هاوڕێ كوردی له‌و كاته‌ى چوه‌ بۆ كڕینی شیر و دایبی بۆ منداڵه‌كه‌ی له‌ دوكان، له‌ رێگادا ئۆتۆمبێلێكی جۆری "بی ئێم ده‌بلیو" رێگای پێده‌گرێت و دوو كه‌س كه‌ جلى مه‌ده‌نیان له‌به‌ردا بوه‌ و چه‌كدار بون داده‌به‌زن و به‌ بۆكس و لێدان هێرشی ده‌كه‌نه‌سه‌رى، له‌كاتی لێدانی پێیان وتوه‌ واز له‌ زمان درێژی ناهێنیت!.

 

پاش برینداركردنى دو كه‌سه‌كه‌ مۆبایل و جزدانه‌كه‌ی كه‌ ناسنامه‌ و بڕه‌ پاره‌یه‌كی كه‌می تێدابوه‌ بردویانه‌.

 

نیاز عبدوڵا، باسى له‌وه‌شكردوه‌: هاوڕێ كوردی ناسراوه‌ به‌ به‌رگریكردن له‌ ئازادی و دادپه‌روه‌ری و ره‌خنه‌گرتن له‌ گه‌نده‌ڵیه‌كانی ده‌سه‌ڵاتداران و چه‌ند ساڵێك له‌مه‌وبه‌ریش له‌ شاری هه‌ولێر له‌ كاتی گه‌ڕانه‌وه‌ی بۆ ماڵ، چه‌ند كه‌سێك به‌ چه‌قۆ هێرشیان كرده‌سه‌رى و برینداریان كرد.