رادیۆی ده‌نگ- زریان محه‌مه‌د
له‌ناو هه‌راوهۆرای ژیانی رۆژانه و له گۆشه‌یه‌كی پڕ له هیوای كفرى، سێ كچه خوێندكار بڕیاریانداوه چرای هۆشیارییه‌ك هه‌ڵبكه‌ن كه ره‌نگه به سودی سه‌دان دانیشتوى شاره دێرینه‌كه بكه‌وێته‌وه. ئه‌مانه ته‌نیا سێ خوێندكار نین، به‌ڵكو سێ خه‌مخۆرن كه ده‌یانه‌وێت هۆشیاریی ته‌ندروستى هاوڵاتیان به‌رز بكه‌نه‌وه.
"تیمی هۆشیاری كۆمه‌ڵگا"، ناوى ئه‌و گروپه‌یه كه سێ كچه خوێندكارى كۆلێژی ته‌كنیكی كفری، دروستیانكردوه. ئامانجیشیان به‌رزكردنه‌وه‌ى ئاستى هۆشیاریی ته‌ندروستى كۆمه‌ڵگایه.
بۆچی ئێستا؟
زیاتر له مانگێكه، چۆپی حه‌یده‌ر، یه‌كێك له ئه‌ندامانی تیمه‌كه و خوێندكاری به‌شی شیكاری خۆراك و ته‌ندروستی، له‌گه‌ڵ دو هاوڕێی دا سه‌رقاڵی بڵاوكردنه‌وه‌ی هۆشیارین له‌ڕێگه‌ی سیمیناری جۆراوجۆره‌وه.
چۆپی، له وه‌ڵامی پرسیاری هۆكاری ده‌ستپێكردنی ئه‌م پڕۆژه‌یه‌دا، به تێگه‌یشتنێكی قوڵه‌وه ده‌ڵێت: "بیرۆكه‌ی ئه‌م پرۆژه‌یه‌مان له‌وه‌وه سه‌رچاوه‌ی گرتوه كه به‌داخه‌وه، كۆمه‌ڵگای ئێمه هێشتا وه‌كپێویست هۆشیار نین به‌رامبه‌ر به ته‌ندروستی و خۆراكی ته‌ندروست، ئێمه ده‌مانه‌وێت ئه‌و بۆشاییه پڕبكه‌ینه‌وه".
په‌یامێكی رون: سه‌ره‌تا له ناوه‌نده‌كانی خوێندنه‌وه
تیمه‌كه بڕیاریانداوه كه سه‌ره‌تا له‌و شوێنانه‌وه ده‌ستپێبكه‌ن كه نه‌وه‌ی داهاتو دروست ده‌كه‌ن: قوتابخانه‌كان و ناوه‌نده‌كانی خوێندن.
ئه‌سما دلێر، خوێندكاری به‌شی شیكاری خۆراك و ته‌ندروستی و ئه‌ندامێكی ترى تیمی هۆشیاری كۆمه‌ڵگا، باس له ده‌ستپێكی كاره‌كانیان ده‌كات: "چالاكییه‌كانمان له سیمیناری هۆشیاریدا خۆی ده‌بینێته‌وه و ده‌ستپێك له قوتابخانه‌كانه‌وه ده‌ستمان پێكردوه".
ئه‌سما هه‌روه‌ها جه‌خت له‌سه‌ر تایبه‌تمه‌ندیی كاره‌كانیان ده‌كاته‌وه: "له ئێستادا ده‌مانه‌وێت ته‌نیا له بواره‌كه‌ی خۆمان كه شیكاری خۆراك و ته‌ندروستییه كاربكه‌ین و نامانه‌وێت په‌ل بهاوێژین بۆ بوارێكی تر، تا بتوانین به شێوه‌یه‌كی چڕتر و سه‌ركه‌وتوتر كاره‌كانمان به ئه‌نجام بگه‌یه‌نین".
خاڵه گرنگه‌كه؛ ته‌ندروستیی خۆراك
كۆمه‌ڵگا پێویستی به تێگه‌یشتنێكی قوڵتر هه‌یه له‌باره‌ی ته‌ندروستیی خۆراكه‌وه. ته‌ندروستی خۆراك ته‌نیا بریتی نییه له خواردن، به‌ڵكو مه‌به‌ست لێی كاریگه‌رییه دروسته‌كانی خواردنی دروست و هاوسه‌نگه له‌سه‌ر جه‌سته و مێشكی مرۆڤ. ئه‌م پرۆژه‌یه ده‌یه‌وێت ئه‌و تێڕوانینه بگۆڕێت و گۆڕانكارییه‌كی راسته‌قینه دروست بكات.
هێلان هیوا، خوێندكاری هه‌مان به‌ش و ئه‌ندامێكی دیكه‌ی ئه‌م تیمه، له‌باره‌ی ئامانجه‌كانیانه‌وه ده‌ڵێت: كاتێك ده‌ستمان به پڕۆژه‌كه كرد، ئامانجێكی به‌رفراوانمان له‌به‌رچاو بو، ئه‌ویش دروستكردنی گۆڕانكاریی راسته‌قینه‌یه له كۆمه‌ڵگادا سه‌باره‌ت به ته‌ندروستیی خۆراك.
هێلان په‌یامی تیمه‌كه‌ی به‌ڕونی ده‌خاته‌ڕو و ده‌ڵێت: په‌یامی ئێمه ئه‌وه‌یه هاوڵاتییان هۆشیار بن سه‌باره‌ت به ته‌ندروستیی خۆراك، چونكه ئه‌مه كلیلی ژیانێكی ته‌ندروسته.
ئاسته‌نگییه‌كان و چاوه‌ڕوانییه‌كانی داهاتو
هه‌ر كارێكی گه‌وره، به تایبه‌ت ئه‌گه‌ر له‌لایه‌ن ژنانه‌وه ئه‌نجام بدرێت، بێ ئاسته‌نگ نییه. هێلان باس له گه‌وره‌ترین ئاسته‌نگی روبه‌ڕویان ده‌كاته‌وه: "ئاسته‌نگی ئێمه نه‌بونی پاڵپشتییه‌كی رێكخراو و لایه‌نه‌كانی په‌یوه‌ست به بابه‌ته‌كه‌یه، پێویستمان به هاوكاری زیاتره بۆ گه‌یاندنی په‌یامه‌كه‌مان به فراوانترین بازنه‌ی خه‌ڵك".
سه‌ره‌ڕای ئه‌وه‌ی ره‌نگه پاڵپشتییه‌كی فه‌رمی و پێكهاته‌یی وه‌كپێویست نه‌بێت، به‌ڵام پێشوازیی كۆمه‌ڵگه هانده‌رێكی گه‌وره‌یه بۆیان. ئه‌سما به دڵخۆشییه‌كی زۆره‌وه له‌باره‌ی پێشوازیی خه‌ڵكه‌وه ده‌ڵێت: پێشوازییه‌كی باشمان لێكراوه، ئه‌مه‌ش هانده‌رێكی گه‌وره‌یه بۆمان كه به‌رده‌وام بین.
له كۆتاییدا، تیمی هۆشیاری كۆمه‌ڵگا له كفرى، ته‌نیا سێ كچه خوێندكار نین كه ته‌نها وانه‌كانیان ده‌خوێنن، به‌ڵكو سێ كچه چالاكوانن و سه‌رقاڵی دروستكردنی داهاتویه‌كی ته‌ندروستتر و هۆشیارترن بۆ ناوچه‌كه‌یان. ئه‌وان نمونه‌یه‌كی دره‌وشاوه‌ی كچانى گه‌رمیانن كه ده‌یانه‌وێت گۆڕانكارییه‌كی ئه‌رێنی له كۆمه‌ڵگاكه‌یاندا دروست بكه‌ن.
- دوایین بابەتەکان
-
پرۆژەراپۆرتێک لەبارەی
-
-
هەواڵکارەبای گەرمیان بۆ نیوە کەمبوەتەوە
-
-
هەواڵروپێویکردنی زەوی فەرمانبەرانی کەلار دەستیپێکردوە، بەڵام سستە
-
-
هەواڵهاتوچۆی گەرمیان لەبارەی بڕیاری دەستبەسەرداگرتنی ئۆتۆمبیلە بێ سەرەتاکان رونکردنەوە دەدات
-
-
هەواڵبەڕێوبەری گشتی پەروەردەی گەرمیان بەوەکالەت پۆستێکی نوێ وەردەگرێت
-
زۆرترین بینراوەکان
