دەنگ نێت

 

به‌شێك له‌ كارمه‌ندان و پزیشكانى نه‌خۆشخانە‌ حكومیەکانی گه‌رمیان بایكۆتیان كردوه‌ به‌هۆى خه‌رج نه‌كردنى موچه‌كانیان، هەندێک ناوەندی دیکەش مۆڵەتی چەند رۆژێک دەدەن بۆ خەرجکردنی موچەکانیان.

 

د. حارس محه‌مه‌د، به‌ڕێوبه‌رى نه‌خۆشخانه‌ى گشتى كه‌لار/ قەڵا، بۆ رادیۆى ده‌نگ باسى له‌وه‌كرد: به‌شێك له‌ كارمه‌ندانى نه‌خۆشخانه‌ بایكۆتیان كردوه‌ به‌هۆى خه‌رج نه‌كردنى موچه‌كانیان، به‌ڵام له‌ بەشی نه‌خۆشخانه‌ى قه‌ڵا ده‌وام ده‌كرێت و نه‌خۆش داخڵ ده‌كرێت.

 

له‌ نه‌خۆشخانه‌ى فریاكه‌وتنى شه‌هید هه‌ژار له‌ كه‌لار به‌هۆى خه‌رجنه‌كردنى موچەكانیانه‌وه‌ ته‌نها حاڵه‌ته‌ گه‌رمه‌كان وه‌رده‌گیرێت و هیچ حاڵه‌تێكى سارد له‌ نه‌خۆشخانه‌ له‌لایه‌ن پزیشكانه‌وه‌ نابینرێن.

 

رزگار له‌تیف، جێگرى به‌ڕێوبه‌رى نه‌خۆشخانه‌ى فریاکەوتنی شه‌هید هه‌ژار له‌ كه‌لار، بۆ رادیۆى ده‌نگ وتى: پزیشكانى نیشتەجێ مانیان گرتوه‌ و هیچ نه‌خۆشێك نابینن.

 

هاوكات، سامان سه‌رتپ، به‌ڕێوبه‌رى نه‌خۆشخانه‌ى شه‌هید خالد گه‌رمیانى له‌ قه‌زاى كفری، به‌ رادیۆى ده‌نگى راگه‌یاند: پزیشكانى نیشته‌جێى خولاو و به‌شێك له‌ كارمه‌ندان بایكۆتیان كردوه‌، به‌ڵام به‌یه‌كجارى ده‌رگاى نه‌خۆشخانه‌ دانه‌خراوه‌.

 

لایخۆشیەوە، رەفیق قادر، لێپرسراوی بەشی کردەپزیشکییەکان (اسعاف فوری) لە تەندروستی گەرمیان کە ئەرکی گواستنەوەی نەخۆشیان لەسەرە، بە رادیۆی دەنگی وت: بەهۆی تایبەتمەندی کارەکەی ئێمەوە جارێ بایکۆتمان نەکردوە و چەند رۆژێک مۆڵەت بە حکومەت دەدەین، دوای ئەوە ئێمەش بایکۆت دەکەین.

 

پێشتریش سەندیکای کارمەندانی تەندروستی هەرێم، مۆڵەتی سێ رۆژی دابوە حکومەت بۆ خەرجکردنی موچەکانیان، بەپێچەوانەوە بایکۆتی دەوام دەکەن.