دەنگ نێت

 

بە فەرمانێکی وەزیری کارەبا، بڕیاردرا داشکاندن بە رێژەی ١٥٪ بۆ نرخی کارەبای نیشتمانی، گەرمیان و هەڵەبجە و راپەڕینیش بگرێتەوە.

 

بەپێی نوسراوێکی وەزارەتی کارەبا کە دوێنێ دەرچوە، بڕیاردراوە بۆ ماوەی ٣ مانگ (لە ٢٠ـی ٨ هەتا ٢٠ـی ١١ـی ٢٠٢٣) دەرفەت بە هاوڵاتیان بدرێت بۆ دانەوەی پارەکانی قەرزی کارەبای نیشتمانی بە داشکاندنی بڕی ١٥٪ـەوە.

 

لایخۆشیەوە وتەبێژی بەڕێوبەرایەتی گشتی کارەبای گەرمیان- ئالان ئەرکان، بە رادیۆی دەنگی وت: بڕیارەکە لەو رۆژەوە لە گەرمیان جێبەجێ دەکرێت کە لە نوسراوەکەدا ئاماژەی پێکراوە.

 

ئەمەش دوای ئەوەهات کە پێشتر ئەم بڕیارە لە سنوری پارێزگای سلێمانی جێبەجێکرا بەبێ پارێزگای هەڵەبجە و ئیدارە سەربەخۆکانی ئەم سنورە.

 

پێشتریش رادیۆی دەنگ بەدواداچونێکی بۆ ئەم پرسە کرد و بەرپرسانی کارەبا رایانگەیاند بۆ ئەوەی داشکاندنەکە گەرمیانیش بگرێتەوە، نوسراویان ئاراستەی وەزارەتی کارەبا کردوە.