ده‌نگ نێت

ماوه‌ى مانگێكه‌ هیچ بڕێكى بانزینی عێراقی ئه‌وه‌ى به‌ نرخی پاڵپشتیكراو ده‌درێت به‌ شۆفێران، بۆ گه‌رمیان نه‌هاتوه‌ و لایه‌نه‌ په‌یوه‌ندیداره‌كانیش هۆكاره‌كه‌ى نازانن.

بەرپرسی هۆبەی بەشە نەوتیەکانی بەرێوبەرایەتی نەوت و کانزاکانی گەرمیان، سالار مەحمود، بە رادیۆی دەنگی وت: ماوەی زیاتر لە مانگێکە ناردنی بەنزینى عێراقی  بۆ گه‌رمیان، راگیراوە.

وتیشی: هۆكاری ئه‌و راگرتنه‌ش رون نیه‌ و نازانرێت.

ئاماژه‌ى به‌وه‌شكرد: سەرباری ئەوەی پارەی 2 بەنزینخانەشمان ناردوە و كێشه‌یه‌ك له‌ نه‌ناردنى پاره‌ى بانزینه‌كان دا نییه‌.

له‌باره‌ى كاتى ده‌ستپێكردنه‌وه‌ى ناردنى ئه‌و به‌نزینه‌، به‌رپرسه‌كه‌ى نه‌وت و كانزاكانى گه‌رمیانه‌ وتى: ته‌نانه‌ت ئه‌و واده‌یه‌ش نازانرێت و له‌وباره‌وه‌ هیچ شتێكمان پێنه‌وتراوه‌.

حكومه‌تى عێراقی به‌شێك له‌و بانزینه‌ى كه‌ خۆی پاڵپشتی نرخه‌كه‌ى ده‌كات، بۆ هه‌رێمى كوردستانى ده‌نێرێت و به‌وهۆیه‌شه‌وه‌ نرخی بانزینی بازرگانى له‌ سنوره‌كه‌دا گرانه‌، بۆیه‌ خواستێكى زۆر له‌سه‌ر ئه‌و بانزینه‌ عێراقیه‌ هه‌بو.