پەیامی رادیۆی ده‌نگ له‌ ساڵیادی دامه‌زراندنى دا

2023/02/06    453 جار بینراوە
 
ئه‌مڕۆ (6ـى شوباتى 2023)، 13 ساڵ به‌سه‌ر دامه‌زراندنى رادیۆی ده‌نگ دا تێده‌په‌ڕێت وه‌كو یه‌كه‌مین و تاكه‌ رادیۆی ئه‌هلی و سه‌ربه‌خۆ له‌ سنورى ئیداره‌ى گه‌رمیان. ئه‌و هۆكارانه‌ى پێش 13 ساڵ له‌ پشت دامه‌زراندنى رادیۆكه‌وه‌ بون، بۆ ئێستاش هه‌ر بونیان هه‌یه‌، ئه‌ویش بره‌ودانه‌ به‌ بونى میدیای ئازاد و جیدیی له‌ سنورى گه‌رمیان، كه‌ له‌سه‌ر خه‌م و كێشه‌ و كۆژانه‌كانى هاوڵاتیان بوه‌ستێت و ببێت به‌ چاودێر به‌سه‌ر حكومه‌ت و داموده‌زگا فه‌رمییه‌كان و ده‌روازه‌یه‌كیش بێت بۆ بره‌ودان به‌ ئازادى و مافی مرۆڤ و بڵاوكردنه‌وه‌ى هۆشیاری بۆ هاوڵاتیان له‌سه‌رجه‌م كایه‌ و بواره‌كان دا. له‌مڕوه‌شه‌وه‌ رادیۆكه‌ هه‌نگاوى زۆری ناوه‌، كه‌ هه‌ڵسه‌نگاندنى ئه‌و هه‌نگاوانه‌ بۆ هاوڵاتیان و چاودێران و وه‌رگرانمان جێدێڵین.
 
هاوشان به‌مه‌ش، كاركردن له‌ماوه‌ى ئه‌م 13 ساڵه‌دا، پڕ ئاسته‌نگ و كێشه‌ بوه‌، چونكه‌ كارابونى میدیایه‌كى ئازاد له‌ ناوچه‌یه‌كى وه‌كو گه‌رمیاندا كه‌ گیرۆده‌ى زۆر كێشه‌ى سیاسی و ئابوری و كۆمه‌ڵایه‌تییه‌، كارێكى ئاسان نه‌بوه‌، بگره‌ زۆر زه‌حمه‌ت و پڕ ئاله‌نگاریی بوه‌، به‌ڵام ئه‌وه‌ى مایه‌ى خۆشحاڵییه‌، ئه‌وه‌یه‌ كه‌ لێنه‌گه‌ڕاوین ئه‌و ئاسته‌نگانه‌ بمانوه‌ستێنن و چۆكمان پێدابده‌ن، به‌ڵكو به‌پێچه‌وانه‌وه‌ كاروانى رادیۆكه‌ رو له‌ گه‌شه‌بونى زیاتره‌، به‌ ئامانجى بره‌ودانى زیاتر به‌ ئازادیی.
 
پیرۆزه‌ ساڵیادی دامه‌زراندنى رادیۆی ده‌نگ، سوپاس و پێزانینی زۆر بۆ كارمه‌ند و هاوكارانى رادیۆكه‌ له‌هه‌مو قۆناغه‌كانى دا، رێزی زۆریش بۆ گوێگران و وه‌رگرانمان، كه‌ هۆكارى سه‌ره‌كی به‌رده‌وام بونمانن.
 
 
رادیۆی ده‌نگ
6ـی شوباتی 2023


Radiodeng.net - 2024
دروستکراوە لەلایەن کۆمپانیای (کۆدتێك)ەوە
ژمارەی سەردان 4,221,225     ژمارەی میوان 276