رادیۆی دەنگ

لە رزگاریی دەستکراوە بە پرۆژەی روناکی، ئەمەش کاریکردوەتە سەر کارەبای قەزاکە، بەڕێوبەرایەتی کارەباش حاڵەتەکە بە کاتیی ناودەبات.

حازم كەریم، بەڕێوبەری گشتی كارەبای گەرمیان، بە رادیۆی دەنگی وت: لە ئەمڕۆوە دەستکراوە بە كاركردن لە پڕۆژەی روناكی بۆ قەزای رزگاریی و كار لە فیدەرەكانیدا دەكرێت.

وتیشی: پرۆژەکە سەرەتا لە ٤ گەڕەكی قەزاكە دەستپێكراوە و دواتر گەڕەکەکانی دیکەش دەگرێتەوە.

ئەمەش لەکاتێکدایە کە پرۆژەکە لەماوەکانی رابردودا لە قەزای کەلار تەواوکرا.

کارەکانی پرۆژەکە لەم قۆناغەدا بریتی دەبێت لە پێداچونەوە و چێککردنی فیدەر و بگۆڕ "محەویلە"ـکانی کارەبا و چاککردنی کەموکورتییەکانیان، بۆ ئەوەی ئامادەبن کە پرۆژەکە دەستیپێکرد.

هاوکات لەگەڵ دەستپێکردنی پرۆژەکە، کارەبای قەزاکە کێشەی تێکەوتوە و ناجێگیر بوە.

بەڕێوبەری گشتی کارەبای گەرمیان، هۆکارەکەی بۆ دەستکردن بە پرۆژەکە گەڕاندەوە و ئاماژەی بەوەکرد ئەم دۆخە کاتییە.

پرۆژەی روناکی بریتییە لە دابینکردنی کارەبای نیشتمانی بە درێژایی رۆژ. پرۆژەکە لە سەنتەری پارێزگاکان و هەندێک لە قەزاکان تەواو بوە و لەئێستادا کار لە ئیدارە سەربەخۆکان و قەزاکانی دیکە و ناحییەکان دیکە دەکرێت.