دەنگ نێت

 

بەڕێوبەری گشتی تەندروستی گەرمیان ئاشکرای دەکات به‌شێك له‌و پزیشكانه‌ى كه‌ عه‌ره‌بن و له‌ سنورى گه‌رمیان ده‌وام ده‌كه‌ن، وازیان لە کارەکانیان هێناوە، ئەمەش گرفتی بۆ دروستکردون بەتایبەتی لە شوێنێکی وەکو قەزای کفری.

 

د. سیروان محه‌مه‌د، بۆ رادیۆى ده‌نگ باسى له‌وه‌كرد: له‌ سنوره‌كه‌دا نزیكه‌ى ٨٠ پزیشكى پسپۆرمان هه‌یه‌ ١٠٪ـی ئه‌و پزیشكانه‌ش عه‌ره‌بن، له‌ ماوه‌ى ٦ مانگى ئه‌مساڵدا نزیكه‌ى ٦ پزیشكی بە رەگەز عەرەبمان گواستویانه‌ته‌وه‌ بۆ ناوچه‌كانى خۆیان.

 

هۆكارى گواستنه‌وه‌ى ئه‌و پزیشكانه‌ش، بەوتەی خۆی بۆ خراپی دۆخى موچه‌ ده‌گه‌ڕێته‌وه‌.

 

وتیشى: ئه‌م پزیشكانى به‌شێكیان له‌ زانكۆكانى هه‌رێمى كوردستان خوێندنیان ته‌واو كردوه‌ به‌پێى پله‌به‌ندى تاوه‌كو پسپۆرییه‌كه‌یان هاتون.

 

هێماى بۆ ئه‌وه‌شكرد: ئه‌م حاڵەتە گرفتى بۆ دروست كردوین له‌ قه‌زاى كفرى، به‌جۆرێك له‌ نه‌خۆشخانەی شارەکەدا له‌ هه‌فته‌یه‌كدا ته‌نها ٤ رۆژ ئێشکگریی ٢٤ كاتژمێریمان هه‌یه‌، هۆكاره‌كه‌شى بۆ گواستنه‌وه‌ى ئه‌و پزیشكانه‌ ده‌گه‌ڕێته‌وه‌ كه‌ بۆشاییان دروستكردوه‌ له‌ تیمه‌كه‌دا.

 

جه‌ختى له‌وه‌شكرده‌وه‌: "ئه‌مه‌ش به‌ڵایه‌كى دیكه‌یه‌ كه‌ توشمان بوه‌ دواى ئه‌و به‌ڵایه‌ی كه‌ پزیشكه‌كانمان به‌ میلاك گواسترانه‌وه‌ سه‌ر زانكۆى گه‌رمیان".