دەنگ نێت

 

لە سنوری گەرمیان سەرجەم فەرمانگەکان ئاگادارکراونەتەوە بەمەبەستی راگرتنی پرۆژەی 'هەژماری من' و کارکردن بۆ ئامادەکردنی لیستی موچەخۆران بەمەبەستی تەوتینکردنی موچەکانیان لە رێگەی بانکە حکومییەکانی عێراقەوە.

 

بەپێی زانیارییەکانی رادیۆی دەنگ، بەشێوەیەکی فەرمی یەکێتی نیشتمانی ئاگاداری ئیدارەی گەرمیان و فەرمانگەکانی سنورەکەی کردوەتەوە، بەمەبەستی ئەوەی لە سبەینێ (یەکشەمە ٦/ ١٠/ ٢٠٢٤) کارکردنی پرۆژەی هەژماری من رابگیرێت و چیتر فۆرمی پڕ نەکرێتەوە.

 

هەربەپێی زانیارییەکان، هاوکات داواکراوە لە فەرمانگەکان هەستن بە ئامادەکردنی لیستی موچەخۆرەکانیان بەمەبەستی تەوتینکردنی لە رێگەی بانکە حکومییەکانی عێراق و بەتایبەتی بانکی TBI کە لە سلێمانی لقی هەیە.

 

ئەم هەنگاوەش دوای ئەوەدێت کە ئەمڕۆ بافڵ تاڵەبانی- سەرۆکی یەکێتی، لە میانەی کەرنەڤاڵی بانگەشەی حزبەکەی لە شاری کۆیە، هێرشیکردە سەر پرۆژەی 'هەژماری من'، ئەمەش بە یەکەم هێرشی فەرمی یەکێتی هەژمار دەکرێت بۆ سەر ئەو پرۆژەیە.